Прадаецца «гатэль у беларускай Швейцарыі». Для інвестара-аматара
У Лагойскім раёне прадаецца турыстычны праект каля Сілічаў з гатовым бізнэс-планам і разліковай акупнасцю за 8—10 гадоў.
Лагойскі раён называюць беларускай Швейцарыяй. Узгоркі, лясы і блізкасць да Мінска зрабілі яго адным з галоўных цэнтраў загараднага адпачынку ў краіне. Менавіта тут размешчаны гарналыжны цэнтр «Сілічы», а да нядаўняга часу працаваў і комплекс «Лагойск».
Цяпер у гэтым рэгіёне на продаж выставілі незвычайны аб'ект — не дом і не базу адпачынку, а праект будучага гатэльна-рэстараннага комплексу на высокай стадыі гатоўнасці.
Комплекс размешчаны побач з трасай М3 Мінск — Віцебск пры павароце на вёску Верагі. Праз дарогу — запраўка «Беларуснафта». Да рэспубліканскага гарналыжнага цэнтра «Сілічы» каля 1,5 кіламетра. На машыне ад МКАД дарога зойме каля 25 хвілін.
Паводле інфармацыі Realt.by, гатэльна-рэстаранны комплекс размясціўся на ўчастку плошчай 1,98 гектара, які знаходзіцца ў доўгатэрміновай арэндзе да 2112 года. Разам з нерухомасцю прадаецца і кампанія, на якую аформлены праект.
Асноўны будынак мае тры паверхі і агульную плошчу 1933 квадратныя метры. У абвестцы годам пабудовы пазначаны 2021-шы. Унутранай аздобы пакуль няма, але асноўныя будаўнічыя работы ўжо выкананыя.
Паводле прадаўцоў, завершанае ўзвядзенне каробкі будынка, мантаж даху, пастаўленыя вокны на ўсіх паверхах і закрыты цеплавы контур. Да комплексу падведзены газ, а водазабеспячэнне плануецца ажыццяўляць з дзвюх уласных артэзіянскіх свідравін — асноўнай і рэзервовай.
Таксама ўжо ўсталяваныя чатыры рэзервуары для чыстай вады аб'ёмам па 50 кубаметраў, сістэма ачышчэння гаспадарча-бытавых сцёкаў і газавая кацельня. На момант публікацыі абвесткі працягваліся работы па аздабленні фасадаў, закупленыя металаканструкцыі для мантажу летняй веранды рэстарана.
Згодна з праектам, комплекс павінен уключаць гатэль на 30 нумароў і рэстаран на 75 месцаў. Аднак гэтым магчымасці не абмяжоўваюцца. Прадаўцы адзначаюць, што тэрыторыя дазваляе пашырыць комплекс за кошт будаўніцтва катэджаў, SPA-зоны, дадатковых пляцовак для адпачынку і іншых турыстычных аб'ектаў.
Асобна падкрэсліваецца, што праект ужо прайшоў дзяржаўную экспертызу, а для яго распрацаваны бізнэс-план з фінансавай мадэллю, ацэнкай рызык і прагнозам акупнасці. Прадаўцоў завабліваюць абяцаннем, што інвестыцыі могуць акупіцца за 8—10 гадоў.
Яшчэ адзін аргумент для патэнцыйнага купца — праект уключаны ў праграму льготнага крэдытавання інвестыцыйных праектаў ў сферы турызму. Стаўка па крэдыце ў рамках прадуктаў Банка развіцця («Турыстычны патэнцыял») складае 6% гадавых на тэрмін да 15 гадоў. Адзначаецца, што праект рэалізуецца пры падтрымцы мясцовых уладаў.
Праўда, будучаму купцу давядзецца ацэньваць праект ужо ў новых умовах. Калі яго распрацоўвалі, адным з аргументаў была блізкасць адразу да двух гарналыжных цэнтраў — «Сілічаў» і «Лагойска». Цяпер апошні спыніў працу, таму поспех будучага комплексу ў большай меры будзе залежаць не толькі ад лыжнікаў, але і ад здольнасці прыцягваць гасцей цягам усяго года — праз загарадны адпачынак, карпаратыўныя мерапрыемствы, SPA-паслугі і іншыя фарматы турызму.
На жаль, у Беларусі пакуль прыклады паспяховых праектаў турыстычных комплексаў побач з аўтамагістралямі толькі адзінкавыя. Найбольш вядомы — Westa на трасе М1 каля Дзяржынска. За некалькі дзесяцігоддзяў з гатэля комплекс ператварыўся ў вялікі шматфункцыянальны цэнтр адпачынку і аздараўлення.
За комплекс каля павароту на Верагі разам з кампаніяй просяць 8,1 мільёна рублёў, або каля 2,9 мільёна даляраў. За такую суму ў прыгарадзе Мінска можна купіць паўтара дзясятка дамоў ці некалькі раскошных катэджаў. Але ў гэтым выпадку гаворка ідзе не пра загарадную нерухомасць, а пра вялікі турыстычны праект, які пры разумным гаспадаранні можа прыносіць добры прыбытак.
Каментары
Such a lonely place, such a lonely place