У Варшаве ўладальніца крамы паказала дызлайкі ўдзельнікам антыўкраінскага мітынгу. Пасля таго яе краму разграмілі
У Варшаве невядомы мужчына разграміў краму LAS RĄK handmade heaven, уладальніца якой некалькі дзён таму адкрыта выступіла супраць антыўкраінскіх лозунгаў падчас акцыі памяці ахвяр Валынскай трагедыі.
Пасля таго выпадку крама стала аб'ектам масавай кампаніі фальшывых негатыўных водгукаў у інтэрнэце. Карыстальнікі пакідалі нізкія ацэнкі, не звязаныя з якасцю тавараў або абслугоўвання. Многія палічылі гэта спробай аказаць ціск на ўладальніцу праз яе грамадзянскую пазіцыю.
Пазней у памяшканне крамы ўварваўся невядомы мужчына, які паводзіў сябе агрэсіўна, пашкодзіў інтэр'ер і знішчыў частку вырабаў ручной працы. Пра здарэнне паведамілі ў паліцыю. Праваахоўнікі вывучаюць запісы з камер відэаназірання і шукаюць нападніка.
Пасля інцыдэнту быў арганізаваны збор сродкаў на аднаўленне крамы і ўзмацненне мер бяспекі.
Нягледзячы на напад, крама працягвае працу. Яе супрацоўнікі займаюцца дабрачыннасцю: штотыдзень гатуюць сотні бутэрбродаў для пажылых людзей, бяздомных і іншых, хто апынуўся ў цяжкай жыццёвай сітуацыі. Па словах уладальнікаў, толькі за мінулы тыдзень яны раздалі 256 бутэрбродаў.
Каментары