Эксклюзіўны электрычны суперкар Ferrari Luce «Chassis 0» прадалі на аўкцыёне RM Sotheby’s падчас аўтамабільнага тыдня ў амерыканскім Мантэрэі, што ў штаце Каліфорнія, за рэкордныя 40 мільёнаў даляраў, паведамляе Бі-бі-сі.
Пачатковая цана аўтамабіля складала каля 1,1 мільёна даляраў, аднак у выніку лота яе перавысілі прыкладна ў 36 разоў. Усе сродкі, атрыманыя ад продажу, праз Фонд Ferrari накіруюць на дабрачынныя мэты. У прыватнасці, грошы пойдуць на развіццё праектаў тэхнічнай адукацыі ў Італіі і ЗША.
Купцом стаў амерыканскі вынаходнік, прадпрымальнік і мільярдэр Герберт «Хербі» Вертхайм. Гэта ўжо не першы ўнікальны Ferrari ў яго калекцыі. У мінулым годзе ён набыў Ferrari Daytona SP3 Tailor Made за 26 мільёнаў даляраў. Грошы ад таго продажу таксама былі перададзеныя на дабрачыннасць.
Ferrari Luce — найноўшая мадэль італьянскага брэнда, якая павінна стаць пачаткам новай эры для кампаніі ў галіне электрамабіляў. Электрычная ўстаноўка суперкара развівае магутнасць 1050 конскіх сіл.
Аўтамабіль з нумарам шасі «0» спецыяльна падрыхтавалі для дабрачыннага аўкцыёну. Ён атрымаў унікальную матавую афарбоўку кузава і эксклюзіўны салон з аздабленнем металізаванай скурай.
Каментары