Завяршаецца рэканструкцыя «Карабліка» — самага адметнага корпуса БНТУ
У БНТУ завяршаюць рэканструкцыю 15‑га навучальнага корпуса, які з 1 верасня павінен зноў прыняць студэнтаў і выкладчыкаў. Пасля абнаўлення будынак стаў не проста месцам для лекцый і практычных заняткаў, а больш сучаснай прасторай для вучобы, адпачынку і харчавання, піша Domovita.by.
Корпус складаецца з дзвюх частак — 15‑павярховай і 8-павярховай. Даўжыня аднаго з калідораў у ніжняй частцы дасягае 130 метраў.
Унутры з’явіліся вялікія аўдыторыі розных фарматаў, сучасныя лабараторыі і памяшканні для практычных заняткаў. У аўдыторыях усталявалі сістэмы аўтаматычнага зацямнення: матарызаваныя жалюзі дазволяць рэгуляваць асвятленне ў залежнасці ад патрэбы.
Трапіць на тэрыторыю корпуса можна будзе праз турнікеты. На першым паверсе размясцілі вялікі гардэроб, а на другім зрабілі прасторны хол. Там захавалі фрэску з сімволікай чатырох факультэтаў, студэнты якіх будуць вучыцца ў гэтым будынку.
Паміж паверхамі будуць працаваць дзевяць сучасных ліфтаў. Таксама прадугледжана спецыяльнае абсталяванне для людзей з абмежаванай мабільнасцю.
Асаблівую ўвагу надалі месцам для адпачынку і самастойнай працы. У корпусе адкрыюцца бібліятэка і чытальная зала з мяккай мэбляй і канапамі. Там студэнты змогуць рыхтавацца да заняткаў, працаваць над групавымі праектамі або адпачываць паміж парамі. На трэцім паверсе абсталявалі зону адпачынку з лаўкамі. Таксама будзе працаваць капіравальны цэнтр.
Для студэнтаў прадугледзелі і магчымасці перакусіць. У корпусе адкрыецца буфет з новай тэхнікай і вітрынамі. Там будуць прадаваць выпечку, гарачыя стравы, салаты і лёгкія перакусы. Акрамя таго, у будынку паставяць кававыя аўтаматы.
Паўнавартасна паабедаць можна будзе ў сталовай № 4 БНТУ, якая знаходзіцца насупраць корпуса на праспекце Незалежнасці, 146.
Змянілася і тэрыторыя вакол будынка. Зялёную зону абнавілі, зрабілі пешаходныя дарожкі і месцы для адпачынку. На клумбах плануюць стварыць вялікую кветкавую кампазіцыю.
Для аўтамабіляў за корпусам абсталявалі новую стаянку на 70 месцаў, яшчэ 20 месцаў прызначаныя для выкладчыкаў. Таксама абнавілі разметку і ўпарадкавалі паркоўкі.
Перыметр корпуса цяпер закрыты сучаснай агароджай з сістэмай бяспекі.
Як ідзе рэстаўрацыя галоўнага корпуса БДУ ФОТЫ
Старую камяніцу каля ратушы ў Магілёве рыхтавалі для гарадскога музея. Цяпер там робяць офіс расійскага пасольства на чале з былым міністрам «ЛНР»
У мінскім Пішчалаўскім замку ўмацоўваюць падмуркі
У Лошыцкім парку адновяць разбураныя капліцу і млын. Як яны будуць выглядаць пасля рэканструкцыі
Каментары
хорошо что не снесли