Падчас гульні Сабаленкі на US Open на корце моцна смярдзела марыхуанай
Беларуска тэнісістка Арына Сабаленка выйшла ў 1/8 фіналу US Open 2026, не аддаўшы суперніцам ніводнага сэта. Аднак падчас матчу трэцяга круга супраць Камілы Рахімавай з Узбекістана першая ракетка свету сутыкнулася з нечаканай праблемай — з трыбун даносіўся моцны пах марыхуаны.
Ужо ў трэцім гейме першага сэта Сабаленка на імгненне спыніла гульню, азірнулася на трыбуны і звярнулася да сваёй каманды. Пасля гэтага яна падышла да суддзі Эвы Асдэракі-Мур і папрасіла разабрацца з заўзятарам, які, паводле яе слоў, курыў марыхуану.
Суддзя адразу дала сігнал супрацоўнікам корта, і прадстаўнікі службы бяспекі накіраваліся на трыбуну, каб знайсці крыніцу паху.
Падобныя выпадкі на US Open адбываюцца ўжо не ўпершыню. Тэнісны комплекс USTA Billie Jean King National Tennis Center знаходзіцца побач з Flushing Meadows Corona Park, дзе ўжыванне марыхуаны дазволена. На тэрыторыі самога турніру курэнне забаронена, аднак дым часам трапляе і на стадыёны.
Арганізатары заявілі, што не могуць кантраляваць тое, што адбываецца за межамі тэніснага цэнтра, але сочаць за выкананнем забароны на курэнне на тэрыторыі комплексу. Пры выяўленні парушэнняў супрацоўнікі робяць заўвагі заўзятарам.
Нягледзячы на непрыемны інцыдэнт, Сабаленка змагла працягнуць матч і ўпэўнена перамагла Рахімаву — 6:3, 6:4, выйшаўшы ў чацвёрты круг турніру.
Праблема з пахам марыхуаны на US Open вядомая даўно. Летась на яе публічна скардзіўся нарвежац Каспер Рууд, а ў 2023‑м немец Аляксандр Звераў таксама казаў пра моцны пах на тэрыторыі Flushing Meadows.
Цяпер чытаюць
26‑гадовага супрацоўніка элітнага падраздзялення мытні асудзілі на 16 гадоў па наборы палітартыкулаў. Сярод іх і «здрада дзяржаве»6
Каментары