Каб захаваць першы радок у сусветным тэнісе, Арыне Сабаленцы трэба толькі перамагаць на US Open
А ейнай пераследніцы Алене Рыбакінай нават можна зняцца з турніру.
У жаночым тэнісе па выніках Адкрытага чэмпіянату ЗША па тэнісе (US Open), асноўная сетка якога стартуе ў нядзелю, імаверная змена лідара. Беларуску Арыну Сабаленку, якая займае гэты радок з 19 кастрычніка 2024 года, могуць зрынуць з першага месца.
Рэч у тым што Арына выйграла турнір год таму. За перамогу ў фінале турніраў Вялікага Шлему (сюды таксама ўваходзяць Australian Open, «Ралан Гарос» і «Уімблдон») даецца 2000 балаў, выхад у фінал — 1300, паўфінал — 780, чвэрцьфінал — 430. І каб іх захаваць у рэйтынгу, згодна з правіламі, іх трэба абараніць. То-бок, калі Арына не пераможа трэці раз запар на турніры (яна выйграла US Open таксама ў 2024 годзе), 2000 балаў згараць, і ў беларускі застанецца не 8575 балаў, як на сёння, а будзе 6575.
У Рыбакінай могуць згарэць усяго 240 балаў за чацвёрты круг у мінулым годзе.
Гэта азначае, што выхад у паўфінал US Open гарантуе Алене званне першай ракеткі свету па выніках турніру. Больш за тое, яна можа ўзначаліць рэйтынг нават у тым выпадку, калі здымецца з US Open, паколькі Сабаленку задаволіць толькі тытул — за выхад у фінал даюць 1300 балаў, якіх не хопіць, каб пакрыць імавернае адставанне ў перспектыве.
Рэйтынг WTA на 25 жніўня
| 1 | Арына Сабаленка | Беларусь | 8575 балаў | |
| 2 | Алена Рыбакіна | Казахстан | 8141 | |
| 3 | Джэсіка Пегула | ЗША | 7265 | |
| 4 | Коры Гаўф | ЗША | 6704 | |
| 5 | Міра Андрэева | Расія | 5443 |
Рэйтынгавыя расклады па выніках US Open
| Месца | Тэнісістка | Рэйтынг на 25 жніўня | Імаверныя страты балаў | Рэйтынг на 14 верасня |
|---|---|---|---|---|
| 1 | Алена Рыбакіна | 8141 | 240 | 7901 |
| 2 | Арына Сабаленка | 8575 | 2000 | 6575 |
| 3 | Джэсіка Пегула | 7265 | 780 | 6485 |
| 4 | Коры Гаўф | 6704 | 240 | 6464 |
| 5 | Міра Андрэева | 5443 | 130 | 5313 |
Лёсаванне сёлетняга US Open пройдзе ў чацвер, а сёння на турніры стартуе мікст — турнір, дзе гуляе і жанчына, і мужчына.
Арына Сабаленка выступіць у пары з Новакам Джокавічам. У першым раўндзе яны заўтра згуляюць з чэшска-брытанскай парай: Катарына Сінякава і Хенры Патэн.
Каментары