Пад Барысавам паранілі яшчэ аднаго мядзведзя. Людзей просяць не хадзіць у лес
У паляўнічых угоддзях Барысаўскай міжраённай арганізацыі Беларускага таварыства паляўнічых і рыбаловаў (БТПР) падчас палявання быў паранены ўжо другі па ліку мядзведзь. Інцыдэнт адбыўся ў раёне вёсак Хаўхоліца і Нежыцы, паведамляе «Мінская праўда».
Пасля ранення мядзведзь схаваўся ў лесе. Спецыялісты Барысаўскага БТПР цяпер вядуць яго пошукі. Паколькі звер паранены і можа паводзіць сябе непрадказальна, сітуацыя небяспечная для людзей, якія знаходзяцца ў лесе.
Мясцовых жыхароў і ўсіх, хто плануе наведаць лес у гэтым раёне, заклікаюць часова ўстрымацца ад такіх паходаў. Калі знаходжанне ў лесе неабходнае, рэкамендуецца быць асабліва асцярожнымі, не сыходзіць з вызначаных маршрутаў і ўважліва сачыць за наваколлем.
Калі хтосьці заўважыць мядзведзя або яго сляды, неабходна неадкладна пакінуць небяспечнае месца і паведаміць пра гэта ў Барысаўскі аддзел БТПР або МНС.
Пошукі параненай жывёлы працягваюцца.
Раней, 8 жніўня, падчас палявання ў гэтым жа раёне быў паранены яшчэ адзін мядзведзь. Ён таксама здолеў схавацца ў лесе.
Каментары