Пустое або прызначанае пад знос арэнднае жыллё ў Беларусі могуць прадаваць усяго за адну базавую велічыню. Пра гэта пасля нарады ў Аляксандра Лукашэнкі расказаў міністр жыллёва-камунальнай гаспадаркі Генадзь Трубіла.
Паводле слоў чыноўніка, цяпер у Беларусі каля 15 тысяч арэндных жылых памяшканняў пустуюць больш за паўгода. Пераважна гэта жыллё, пабудаванае яшчэ ў савецкія часы ў сельскіх населеных пунктах.
Больш за 1,3 тысячы такіх памяшканняў плануюць зноў увесці ў гаспадарчы абарот, паколькі на іх ёсць попыт. Яшчэ больш за 2,5 тысячы кватэр і дамоў патрабуюць рамонту, а каля 6 тысяч прапануецца знесці праз незапатрабаванасць і аварыйны стан.
Аблвыканкамы ўжо распрацавалі планы па выкарыстанні пустога жылля. Адным з прапанаваных механізмаў стала магчымасць для мясцовых органаў улады прадаваць памяшканні, якія патрабуюць рамонту або падлягаюць зносу, за адну базавую велічыню.
Цяпер існуе і механізм аўкцыёну з паніжэннем пачатковай цаны. Аднак, як адзначыў міністр, такая працэдура займае каля дзевяці месяцаў і патрабуе дадатковых выдаткаў на ацэнку жылля і арганізацыю таргоў. Пры гэтым вынік не заўсёды апраўдвае выдаткі. Таму прапануецца, каб мясцовыя ўлады самі вызначалі пералік памяшканняў, якія можна будзе прадаваць за адну базавую велічыню.
Для арэнднага жылля, якое патрабуе рамонту, прапануюць яшчэ адзін варыянт. Калі чалавек захоча засяліцца ў такую кватэру і самастойна зрабіць рамонт, кошт выкананых работ могуць вылічваць з арэнднай платы. Такім чынам, на пэўны час арандатар можа быць вызвалены ад аплаты за жыллё.
Трубіла заявіў, што пасля абмеркавання розных варыянтаў улады бачаць некалькі спосабаў вярнуць пустое арэнднае жыллё ў гаспадарчы абарот.
Ён таксама нагадаў пра ўжо наяўную магчымасць выкупу арэнднага жылля. Ёю могуць скарыстацца маладыя спецыялісты найбольш запатрабаваных прафесій, якія жывуць у населеных пунктах з колькасцю насельніцтва да 20 тысяч чалавек. Для гэтага яны павінны адпрацаваць дзесяць гадоў у арганізацыі, якая дала ім жыллё.
«Капейкі заплаціць не могуць». Лукашэнка абурыўся пратэрмінаванымі запазычанасцямі за арэнднае жыллё
Мінчанцы, якая прасіла ў Лукашэнкі кватэру за трох народжаных дачок, пакуль падарылі трохмесную каляску
У Мазыры жыллё, якое планавалася для льготнікаў, зрабілі арэндным
У Брэсце прадаюць маленечкую аднапакаёўку, дзе пасля застануцца жыць маці і дачка. У чым прыкол?
Цяпер чытаюць
23‑гадовага афіцэра брыгады спецназа асудзілі на 19 гадоў за «здраду дзяржаве»13
23‑гадовага афіцэра брыгады спецназа асудзілі на 19 гадоў за «здраду дзяржаве»
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў88
Каментары