Жыхарка Камянецкага раёна набыла звычайны хлеб-«цаглінку», выраблены на мясцовым хлебазаводзе, але ў бохане знайшла металічны прадмет, які быў запечаны непасрэдна ў скарынцы. На выгляд ён нагадваў невялікую трубку або шайбу, пішуць «Навіны Камянеччыны».
Пакупніца сфатаграфавала знаходку 18 верасня і перадала фота вытворцу. На прадпрыемстве пацвердзілі, што металічны прадмет сапраўды мог трапіць у хлеб праз няспраўнасць абсталявання.
Як патлумачылі на заводзе, у ноч перад тым, як жанчына набыла хлеб, у хлебапякарнай печы з лініі, якая накіроўвае прадукцыю, саскочыў ланцуг. Мяркуецца, што ў гэты момант адляцеў адзін з элементаў мацавання і трапіў у пустую форму для хлеба, які выпякалі ў наступнай партыі.
Няспраўнасць была нязначнай: абсталяванне хутка адрамантавалі, зламаную дэталь замянілі, а прастой прадпрыемства працягваўся не больш за паўгадзіны.
На хлебазаводзе дапусцілі, што металічны элемент не заўважылі з-за яго невялікага памеру і чалавечага фактару. Прадстаўнікі прадпрыемства прынеслі пакупніцы свае прабачэнні.
Цяпер чытаюць
Цэны на кватэры ў «Мінск-Свеце» падаюць, а ў Мінску — растуць. Сумныя перспектывы для раёна?3
Каментары