Экс-палітвязень расказаў пра незвычайны падарунак, які ён сам нядаўна зрабіў уласнымі рукамі, піша «Белсат».
«Усім па прывітанні, спадарства! Піша мне нядаўна Кашчэй (у свеце вядомы, як Эдуард Пальчыс): «Паша-Паша, патрэбная дапамога. Хочам мы з Маленькім Ласём (у свеце вядомым, як Ігар Лосік) зрабіць падарунак Нехце (у свеце вядомым, як Сцёпа Пуціла). Ды не просты, а тэматычны.
Патрэбныя нарды з хлеба, — працягвае мой суразмоўца. — Але праблема ў тым, што ў нас рукі растуць не з таго месца, з якога трэба, ды і ты, Вінаград, да стваральнай працы не здольны, але, як мацёры крытчык, павінен адужаць гэтую малую форму».
А я што? У мяне таксама рукі растуць не з месцаў, прадугледжаных эвалюцыяй, але тым не менш. «Давай спрабаваць!» — кажу. Толькі адразу пазначыў няхілую непераадольную перашкоду: такога хлеба, як у турме, няма і ўзяць яго няма дзе.
Ці разумееце, спадарства, хлеб у турме — гэта цуда цудоўнае. Сыры ўнутры і перасмажаны звонку. Пры паглынанні шыкоўна напаўняе газамі кішэчнік, і для вырабаў — самае яно. Пайшоў я шукаць максімальна набліжаны варыянт і знайшоў. Таму цяпер будзе невялікі майстар-клас па вытворчасці нардаў з таго, што ёсць у камеры.
Спачатку бяром наш хлебушак, абразаем з яго скарыначкі і пачынаем апантана камячыць, да стану цеста. Паколькі такой сырой жыжкі, як у турме, я не знайшоў, прыйдзецца змочваць вадзіцай.
У нардах фішкі двух розных колераў, таму частку хлеба фарбуем адным з даступных нам у камеры колераў — сінім. Для гэтага дзярбанім асадку, дастаём стрыжань і выдзімаем з яго ўсё чарніла прама ў нашу нарыхтоўку. Атрымаецца гэтакая сіняя субстанцыя.
А яшчэ ў нардах проста неабходныя кубікі (яны ж зарыкі, яны ж камяні, яны ж косткі і— 2 штукі).
Іх таксама добра было б пафарбаваць, але для гэтага ўжо будзем выкарыстоўваць грыфель ад каляровых алоўкаў. Па-першае, каб не паўтарацца, а па-другое, там колер вясёленькі. Таму бяром аловак, дастаём грыфель і раструшчваем яго да стану парашка, дадаём у мяты хлеб і старанна замешваем.
Ва ўсе нашы хлебныя нарыхтоўкі дадаём па добрай дробцы солі і пакідаем кіснуць у шчыльна завязаных цэлафанавых пакетах на содні. Трэба гэта для таго, каб хлебная магія здарылася і нашы вырабы не трэскаліся пры высушванні. На наступны дзень можам смела пачынаць фармаваць нашы вырабы. Я ляпіў адразу значна больш, чым трэба, таму што падазраваў, што занадта якасны літоўскі хлеб мяне падвядзе і частка фішак і кубікаў патрэскаецца (так яно і выйшла).
Паколькі па частцы малявання я кепскі (гл. вышэй на месца вырастання рук), дык поле маляваць прыйшлося Маленькаму Ласю, з чым ён выдатна справіўся. Каб вы разумелі, наколькі я кепскі ў маляванні, у мяне ў цырульнай хабзе быў прадмет «малюнак». А ведаеце, спадарства, колькі гэтых самых малюнкаў я намаляваў самастойна за час навучання? Правільна — нуль. Усё неабходнае малявалі мне мае аднагрупніцы за шакаладкі.
Поле неабходна наляпіць на кардон, каб яно не камячылася пры эксплуатацыі. Маленькі Лось прапанаваў выкарыстоўваць для гэтага клей-аловак, пасля чаго быў неадкладна мною пасланы. Які яшчэ клей-аловак?! Толькі клейстар, толькі хардкор і аўтэнтык. Бярэм той жа хлеб, прыкладна паўлыжкі цукру і пачынаем жаваць. Далей гэтая неапетытная жыжка праціраецца праз насоўку, нацягнутую на мыльніцу — і вуаля! Наша клейкая жыжка гатовая. Злучаем з яе дапамогай наша поле і лісты кардона.
Застаецца апошні штрых — кубікі. Яны ўжо сфармаваныя і падсохлі, дзіркі ў іх я панатыкал стрыжнем загадзя, таму засталося чымсьці іх зафарбаваць. Дылетанты выкарыстоўваюць зубную пасту.
Можна і так, вядома, але дасведчаныя людзі ведаюць, што яна абавязкова вываліцца ў самы неадпаведны момант. А вось крэм-паста Тэймурава (штука такая ад празмернай патлівасці ног. Яе пры сабе ў камеры можна мець для паляпшэння навакольнага асяроддзя. Г — гуманізм.) — выбар майстроў. Шчодра змазваем нашы кубікі, прыбіраем лішкі і ўсё гатова!
Сцёпа, з днём народзінаў цябе! Хай усё будзе!» — напісаў Павел Вінаградаў.
Цяпер чытаюць
«Надзея Сцяпанаўна». Мікіта Найдзёнаў апублікаваў паэму, якая нарадзілася ў Жодзінскай турме. Такога паэтычнага эпасу ў беларускай паэзіі ХХІ стагоддзя яшчэ не было66
Каментары