Новы трэнд — у «Мінск-Свеце» ўсё часцей здаюць кватэры з голымі сценамі. Колькі просяць?
Здача кватэр без аздаблення ў доўгатэрміновую арэнду — трэнд апошніх некалькіх гадоў, калі цэны на нерухомасць і арэнду моцна пайшлі ўгору. Праўда, раней такія аб'явы былі адзінкавымі, аднак цягам апошняга года іх колькасць значна павялічылася. Асабліва шмат прапаноў у так званых «бізнэс-апартаментах».
Замкавыя апартаменты
Арэндныя стаўкі на кватэры без аздаблення пачынаюцца з 700 рублёў (каля $240). Столькі просяць за бізнэс-апартаменты плошчай 42 метры ў доме «Мірскі замак», што на вуліцы Савіцкага.
Кватэра ўяўляе сабой памяшканне без перагародак і хоць якога аздаблення. Ад асноўнага памяшкання аддзелены толькі санвузел, дый ён без дзвярэй. У апісанні пазначана, што кватэра (юрыдычна — бізнэс-апартаменты) здаецца на працяглы тэрмін.
Звычайная аднапакаёўка-студыя
Наступная па цане прапанова — 730 рублёў (каля $250). Гэта ўжо не бізнэс-апартаменты, а сапраўдная кватэра плошчай 37 метраў.
Кватэра таксама без аздаблення. Здаецца тэрмінам ад трох месяцаў да трох гадоў.
Уласнік патрабуе перадаплату за два месяцы і пры гэтым адзначае, што арандатара будуць чакаць невялікія ў параўнанні з бізнэс-апартаментамі камунальныя плацяжы: 120 рублёў у зімовы перыяд і 50 рублёў у летні, а таксама іншыя выдаткі па лічыльніках.
Адметна, што большасць кватэр, якія здаюць без аздаблення гэта бізнэс-апартаменты ў «Мірскім» або «Нясвіжскім» замках.
Наколькі такія кватэры карыстаюцца попытам, меркаваць складана. Некаторыя аб'явы вісяць яшчэ з ліпеня.
І ўсё гэта менавіта бізнэс-апартаменты, якія дэ-факта нічым не адрозніваюцца ад звычайных кватэр у «Мінск-Свеце», апроч больш высокіх камунальных плацяжоў, бо налічваюцца па тарыфах для юрыдычных асоб.
З відам на бізнэс-цэнтр
За кватэру ў доме 2024 года пабудовы плошчай 55 метраў, з вокнаў якой адкрываецца від на вежы бізнэс-цэнтра, просяць 950 рублёў (каля $320).
У астатнім у кватэры ўсё стандартна: голыя сцены і адсутнасць перагародак паміж пакоямі.
Сем гадоў без рамонту
Пры гэтым сярод жытла з голымі сценамі знаходзяцца не толькі кватэры на 24‑55 метраў, але і трохпакаёўка на 88 метраў.
Дом 2019 года пабудовы, але ў гэтай кватэры дагэтуль голыя сцены і нават няма перагародак паміж пакоямі. Нават ванны пакой і туалет выдзелены толькі пачаткам сцен з чатырма радамі цэглы.
За месяц арэнды такой кватэры просяць 970 рублёў ($330). Пры гэтым у аб'яве пазначана, што апартаменты не гатовыя здаваць замежнікам, а пры засяленні трэба заплаціць адразу за месяц наперад і дадаткова пакінуць гарантыйны плацеж у памеры месячнай арэнды.
«Мінімальныя выгоды ёсць»
За 1000 рублёў ($340) у «Мінск-Свеце» здаюць студыю на 28 квадратаў з частковымі выгодамі.
У кватэры ёсць канапа, рукамыйнік, дзве старыя шафы, стол-кніга і два крэслы. Большая частка падлогі засцелена дыванамі. На невялікай частцы ляжыць ламінат. У якасці ложка — двухспальны матрац.
Сцены голыя, і толькі частка з іх прыкрытая лістамі гіпсакардону. Як пазначана ў апісанні, кватэра здаецца без аздаблення, але жыць можна. «Мінімальныя выгоды прысутнічаюць».
У ванным пакоі ёсць ванна, унітаз і невялікі рукамыйнік. На падлозе — старыя дываны.
Агулам у сталіцы цяпер здаецца каля дзесяці кватэр з голымі сценамі, і ўсе яны — у «Мінск-Свеце». Выглядае, што гэта ў большасці сваёй і ёсць тыя самыя «інвестыцыйныя» кватэры, якія будаваліся ўласнікамі не для таго, каб пераехаць туды жыць.
У выпадку з бізнэс-апартаментамі, квадратны метр у якіх каштаваў крыху танней, чым у звычайных кватэрах у «Мінск-Свеце», вышэйшы тарыф на камунальныя плацяжы можа быць дадатковым стымулам для ўласнікаў здаваць кватэру ў арэнду ў любым стане.
Цяпер чытаюць
Віцебскі вядучы пажартаваў на закрытым мерапрыемстве. Праз дзве гадзіны да яго прыехала міліцыя праз данос8
Віцебскі вядучы пажартаваў на закрытым мерапрыемстве. Праз дзве гадзіны да яго прыехала міліцыя праз данос
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1414
Каментары