На мяжы з Беларуссю Польшча створыць вайсковую частку
Пра гэта паведаміў міністр абароны Польшчы Марыуш Блашчак. Вайсковая частка будзе ў Чарна-Беластоцку, у 35 кіламетрах ад беларускай мяжы.
13.08.2023 / 15:27
Фота: gov.pl
«Менавіта тут, у Чарна-Беластоцку, будзе размяшчацца падраздзяленне разведвальнага палка, але і тут будуць войскі тэрытарыяльнай абароны. Салдаты тэрытарыяльнай абароны таксама будуць размешчаны тут», — сказаў міністр Марыюш Блашчак падчас візіту на Падляшша.
Кажучы пра прычыны такога рашэння, польскі міністр адзначыў дзеянні Расіі і Беларусі і гібрыдныя атакі, з якімі сутыкаецца Польшча.
«Сёння мы ўсе бачым, што адбываецца за нашай усходняй мяжой. Пуцін спрабуе аднавіць імперыю. Была Расія белай або чырвонай, ці цяпер яна пуцінская, Расія заўсёды адна і тая ж, калі гаворка ідзе пра метады, якія яна выкарыстоўвае, калі гаворка ідзе пра агрэсію, якую яна здзяйсняе. Таму ў адказ на гэтыя пагрозы мы ўзмацняем польскае войска. Такім чынам, у Падляскім ваяводстве ствараецца дывізія».
Блашчак дадаў, што падраздзяленне ў Чарна-Беластоцку — адно з некалькіх адноўленых і створаных на Падляшшы.
«Я кажу пра блок у Кольне, хутка будзе блок у Граеве, у Аўгустове, Сямяцічах, ну і тут, у Чарна-Беластоцку. Падраздзяленні створаны для таго, каб адпудзіць агрэсара, каб агрэсар не адважыўся ўвайсці ў Польшчу, каб ён не адважыўся напасці», — падкрэсліў міністр.
Нагадаем, што праз пастаянныя спробы незаконнага перасячэння польска-беларускай мяжы і наяўнасць у Беларусі некалькіх тысяч наймітаў ПВК «Вагнер» Польшча пачала істотна павялічваць колькасць сваіх узброеных сіл побач з Беларуссю і нават прапрацоўвае план поўнага закрыцця мяжы.
У дадатак да гэтага польскія ўлады выказалі жаданне размясціць у сябе амерыканскую ядзерную зброю ў адказ на размяшчэнне такой жа ў Беларусі з боку Расіі.
Чытайце таксама:
У Польшчы адказалі Пуціну, які назваў яе заходнія тэрыторыі «падарункам Сталіна»
Польская армія пачала на мяжы з Беларуссю аперацыю Rengaw
МЗС Польшчы расказала, што павінна здарыцца для паляпшэння адносін Варшавы і Мінска
«Нанесці прэвентыўны ўдар па Варшаве». Прапагандысты пужаюць, што палякі хочуць напасці на Беларусь