BYSOL эвакуяваў сям’ю Ігара Случака і Аліны Нагорнай
Пра тое, што сям'я Ігара Случака і Аліны Нагорнай эвакуяваная, паведаміў Андрэй Стрыжак у сацсетках.
25.10.2023 / 13:49
«Гэта была асаблівая эвакуацыя са складанымі і драматычнымі рашэннямі. Складаная яшчэ і тым, наколькі шмат Аліна і Ігар змаглі зрабіць знаходзячыся ў Беларусі дагэтуль(!). Іх расповед пра жыццё апошніх трох год — гэта драматычны прыгодніцкі трыллер і гэты расповед варты асобнай кнігі.
Аліна і Ігар пратрымаліся максімальна доўга, працягваючы займацца праваабарончай дзейнасцю ўнутры краіны, але кола вакол іх звузілася настолькі і справа стала такой небяспечнай, што яны былі вымушаныя з'ехаць», — напісаў Стрыжак.
Сям'я цяпер знаходзіцца ў Вільні, ім таксама патрэбная дапамога на пару гадзін у дзень па догляду за дзецьмі, каб у дарослых была магчымасць наладзіць побыт і пачаць працаваць.
Яшчэ патрэбныя некаторыя рэчы: зімовыя дзіцячыя камбезікі (1 год і 3 гады — памеры 80 і 98), асвятляльныя прыборы (таршэры, настольныя лампы), дзіцячая ванначка, дзіцячыя стулікі (2-4) і столік, невялікі дзіцячы вазок.
Калі вы можаце дапамагчы, пішыце ў асабістыя Alina Nahornaja.