U Rasii stvarajuć radykalnyja atrady «AKVD». Što heta takoje?
Hrupy «Antykvadrobieraŭ», jakija nibyta stvarajucca pa ŭłasnaj inicyjatyvie rasijskich hramadzian i padletkaŭ, stali adsočvać i źbivać ludziej, jakija zajmajucca kvadrobikaj. Pa infarmacyi dziaržaŭnych miedyja, novy radykalny ruch pačaŭ raspaŭsiudžvacca pa ŭsioj Rasii, niekatoryja ź ich natchniajucca PVK «Vahnier».
28.10.2024 / 09:49
Avatarka adnoj z hrup «Antykvadrobieraŭ» («AKVD»), natchnionaja simvałam sumna viadomaj PVK «Vahnier». Hetyja hrupy, jakija staviać na svaje avatarki padobnyja simvały, publikujuć u siabie videa ździekaŭ ź dzieciej i darosłych, jakija zajmajucca kvadrobikaj.
U Rasii ŭžo niekalki miesiacaŭ idzie aktyŭnaja prapahandysckaja kampanija suprać kvadrobieraŭ — biaskryŭdnaj subkultury, papularnaj pieravažna siarod dziaciej i padletkaŭ, jakija imitujuć pavodziny žyviołaŭ, nosiačy adpaviednyja chvasty, maski, vuški i hetak dalej. Pa televizary i ŭ internecie prapahanda źviazvaje padobnyja pavodziny ź psichičnymi adchileńniami (navat z dyviersijnymi dziejańniami Zachadu) i zaklikaje baćkoŭ advodzić svaich dziaciej-kvadrobieraŭ da psichijatraŭ.
Praŭładnaja rasijskaja hazieta «Maskoŭski Kamsamolec» kanstatuje fakt istotnaha rostu ahresii rasijskich hramadzian da fienomienu kvadrobieraŭ i paviedamlaje ab źjaŭleńni ŭ Rasii hrup novaha radykalnaha ruchu «Antykvadrobieraŭ» (ci «AKVD»), jakija palujuć na luboha, chto byŭ zaŭvažany ŭ kvadrobierstvie.
«Dziaciej z vuškami łoviać, abražajuć i źbivajuć. Da ahresiŭnych padletkaŭ dałučylisia i darosłyja, vierahodna, nie zusim adekvatnyja ludzi, jakija ŭsprymajuć kvadrobieraŭ jak sacyjalna dazvolenuju mišeń dla vykidu ŭnutranaj ahresii», — piša «Maskoŭski Kamsamolec».
Pa słovach apytanych hazietaj dziciačych psichijatraŭ, voś užo niekalki miesiacaŭ baćki, napužanyja infarmacyjaj pra toje, što kvadrobika viadzie da psichičnych zachvorvańniaŭ, viaduć svaich dziaciej na pryjom da śpiecyjalistaŭ pravieryć ich psichičnaje zdaroŭje.
Dzieci-kvadrobiery z usioj krainy skardziacca daktaram, što na ich abviaścili sapraŭdnaje palavańnie.
«Źjavilisia hrupy chłopcaŭ, jakija nazyvajuć siabie «AntyKVD». Pieraśledujuć mianie i maich siabroŭ, abzyvajuć, adzin ź ich plunuŭ mnie ŭ patylicu. Inšaj dziaŭčyncy hetyja «antyki» raźbili nos, daviałosia vyklikać chutkuju. Ciapier antykvadrobierskija videa zapaŭniajuć usie videachostynhi», — cytuje adzin z apytanych hazietaj dziciačych psichijatraŭ apovied dziaŭčyny-kvadrobiera.
Kvadrobierka. Fota ilustracyjnaje
Inšyja dzieci i padletki z roznych rehijonaŭ Rasii, jakija zajmajucca kvadrobikaj, paćvierdzili «Maskoŭskamu Kamsamolcu», što na ich pačali napadać hrupy «akvdešnikaŭ».
Ala z horada Čaremchava Irkuckaj vobłaści padzialiłasia, jak na ich sustreču pa kvadrobicy napali nieznajomyja chłopcy.
«Jany siadzieli na łaŭcy, pili piva, a my prosta biehali. Hetyja chłopcy hladzieli na nas, potym padyšli i źbili adnaho z našych chłopčykaŭ. Astatnija ŭciakli», — dzielicca Ala.
Illa z horada Nižniekamsk Respubliki Tatarstan raspavioŭ «MK», jak jon u žniŭni naviedvaŭ treniroŭku pa kvadrobicy i zaŭvažyŭ, jak na jahonych siabraŭ pačali palavańnie.
«Ja padyšoŭ bližej i ŭbačyŭ, jak natoŭp starejšych chłopcaŭ biehaje z pałkami za kvadrobierami, jakija tolki pačali svaju treniroŭku. Ja schavaŭsia za dom. Tudy nie pajšoŭ, inakš i mnie dastałasia b. Chłopcaŭ z pałkami spužała maci adnaho z kvadrobieraŭ. Z taho dnia ja našu elektrašokier u kišeni», — uspaminaje Illa.
A Daniła z Sankt-Pieciarburha apisaŭ haziecie incydent, jaki adbyŭsia na jahonych vačach u pačatku vieraśnia padčas treniroŭki. Darosły mužčyna abłajaŭ maciukami i źbiŭ vaśmihadovuju dziaŭčynku za zaniatki kvadrobikaj.
«Spačatku jon na jaje łajaŭsia matam, kryčaŭ, što jana psichična chvoraja. A potym padyšoŭ, udaryŭ pa hałavie, sarvaŭ masku i vykinuŭ. Pasprabavaŭ adarvać i chvost, ale ŭmiašaŭsia minak, jaki advioŭ hetaha mužčynu i ŭdaryŭ jaho. Dziaŭčynka stajała pobač i płakała, a minak sprabavaŭ jaje supakoić», — apisvaje Daniła.
Prykład hrupy AKVD, jakaja publikuje ŭ siabie ździeklivyja videa napadaŭ na kvadrobieraŭ. Na skrynšocie pieršaje paviedamleńnie ŭ adpaviednym telehram-kanale, jakoje było napisana jašče ŭ mai hetaha hoda
Nahadajem, što niadaŭna ŭ efiry rasijskaha pravasłaŭnaha telekanała «Spas» rasijski Z-prapahandyst Siarhiej Michiejeŭ, časty hość prahram Uładzimira Sałaŭjova, nazvaŭ fienomien kvadrobieraŭ «kalektyŭnym varjactvam i sadamaza-chreńniu, jakuju prydumali na Zachadzie dla pryhniotu dziaciej i niepaŭnaletnich».
Prapahandyst kazaŭ taksama, što kvadrobiery, prypadabniajučysia žyviołam, «adychodziać ad božaj zadumy, što ŭźvialičvaje čałavieka, i traplajuć pad upłyŭ Satany, jaki pašle ich na zaboj».
Tuju ž dumku padtrymlivajuć i łukašenkaŭskija prapahandysty, jakija napieraboj pačali krytykavać kvadrobieraŭ i ich baćkoŭ, pastaviŭšy dziciačaje chobi ŭ adzin šerah z satanizmam (a taksama homaseksualizmam i pryjomam narkotykaŭ).
Fienomien kvadrobieraŭ pajšoŭ ad kvadrobiki (ad łac. quattuor — «čatyry» i anhł. aerobics — «aerobika») — nieaficyjnaha vidu sportu rodam ź Japonii, u jakim jak dzieci, tak i darosłyja pieramiaščajucca na karačkach, imitujučy ruchi žyvioł. Padčas zaniatkaŭ pryniata vykarystoŭvać maski i nakładnyja chvasty ŭłasnaj vytvorčaści. Čaściej za ŭsio kvadrobiery — heta dzieci i padletki 7-14 hadoŭ, dla jakich heta chutčej hulnia, čym spartyŭnaje spabornictva.
U milicyi raskazali, za što buduć karać kvadrobieraŭ
Nie kvadrobierami adzinymi. Niefarmały 2000-ch raskazali, čamu było niebiaśpiečna stanavicca ema i jak źjadańnie kormu z sabačaj miski dapamahaje intraviertam