Dziaržprapahanda pastaviła novuju modnuju ŭ padletkaŭ subkulturu ŭ adzin šerah z satanizmam

Paśla taho, jak rasijskaja śpiavačka Mia Boyka na svaim kancercie vyvieła na scenu maleńkuju dziaŭčynku ŭ mascy kotki i vyrašyła pakpić ź jaje, zapytaŭšy «Ty ŭ nas kaciania ci kvadrobier, nie daj boža?», pačałasia novaja chvala abmierkavańnia subkultury. U tym liku ŭ biełaruskaj prastory: dziaržmiedyja napieraboj pačali krytykavać kvadrobieraŭ i ich baćkoŭ, pastaviŭšy dziciačaje chobi ŭ adzin šerah z satanizmam (a taksama homaseksualizmam i pryjomam narkotykaŭ).

Pavialičyć

Na dumku žurnalistaŭ praŭładnych miedyja, dziaržavie treba bolš surjozna pracavać z padobnymi prajavami ŭ moładzievym asiarodździ, uziaŭšy ich pad kantrol.

Voś tolki častka razvah:

Pavialičyć

Pavialičyć

U sacyjalnych sietkach źjaŭlajucca pieršyja supołki dla kvadrobieraŭ-adnadumcaŭ u Biełarusi, prajšli pieršyja schodki.

Na fonie hetaha adny baćki paddajucca panicy, raźviazanaj u dziaržaŭnych miedyja, a inšyja darosłyja pryhadvajuć, što ŭ dziacinstvie kožny z nas hulaŭsia i ŭjaŭlaŭ siabie roznymi piersanažami, a na Novy hod — i pieraŭvasablaŭsia ŭ ich. Błohierka ź Minska Viktoryja Hruk uvohule zapisała cełaje videa ŭ abaronu dziaŭčynki-kvadrobiera. 

Psichaterapieŭt: «Dzieciam treba nahulacca»

Nie stavicca da subkultury jak da niečaha niebiaśpiečnaha zaklikaje i psichaterapieŭt, da jakoha «Naša Niva» źviarnułasia pa kamientar (my nie publikujem jaho imia ŭ metach biaśpieki).

Na dumku śpiecyjalista, padobnaja hulnia nie moža naškodzić psichicy padletka i traŭmavać jaje, jak heta padajecca ŭ dziaržaŭnych ŚMI:

«Dzieciam patrebnyja hulni, tamu što ŭ hulniavoj formie jany vučacca być darosłymi. Hulnia — najvažniejšaja častka raźvićcia čałavieka. Tryvožnyja formy heta moža nabyvać u vypadku, kali dzicia bavić takim čynam zališnie šmat času. Kali ŭ žyćci zastajucca adny zabavy».

Śpiecyjalist adznačaje, što lubyja pavodziny dziaciej — heta adlustravańnie taho, što adbyvajecca vakoł i ŭ hramadstvie ŭ cełym:

«Siońnia naša hramadstva zavostrana na spažyvalnictva, i my atrymali vialikuju kolkaść ludziej, jakija zusim nie chočuć staleć. U vyniku ŭzrost staleńnia pasunuŭsia. Sučasny čałaviek u 25 hod moža być na ŭzroŭni dziciaci 14-15 hadoŭ, i dobra, kali pad 30 hod jon pastaleje».

Surazmoŭca zaŭvažaje, što ŭ lubyja subkultury i supolnaści dzieci čaściej za ŭsio prychodziać praź niedachop niečaha ŭ siamji i asiarodździ.

«Zhadać tyja ž «Sinija kity», inšyja hrupy samazabojcaŭ. Jany rabilisia aktualnymi dla padletkaŭ, u jakich i tak naziralisia prablemy. U jakich baćki mahli šmat pracavać i šmat zarablać, ale pry hetym nie davać dzieciam patrebnaj uvahi. U kaho mahli być zaležnaści. U subkulturach i novych supołkach takija dzieci znachodziać padtrymku i parazumieńnie».

Pry lubym raskładzie psichaterapieŭt raić nie panikavać, kali vaša dzicia pačynaje cikavicca takim ci inšym chobi, i nie vykarystoŭvać zabaronu jak adziny dziejsny mietad vychavańnia.

«Dzieciam treba nahulacca i ŭ katoŭ, i ŭ sabak, paskakać i pabiehać. Ale kali ŭ takoj ci inšaj cikaŭnaści jon pačynaje prapadać, źnikać tam dniami, tut užo moža adbyvacca niešta nie toje — treba tady zrazumieć, što nie tak.

Mahčyma, treba budzie pačać ź siabie, zadaŭšy sabie pytańni: a ci razmaŭlaju ja ź dziciom, ci źjaŭlajusia prykładam dla jaho, ci vykonvaju sam toje, što prapahanduju — zamiest taho, kab prosta pavučać. Kłapacicca treba nie pra simptomy, a pryčynu luboj źjavy».

• 6
• 1
• 1
• 7
• 0
• 0
• 0
• 0