Kitajskija chakiery mahli atrymać dostup da telefonaŭ Trampa i zvyš sotni top-čynoŭnikaŭ ZŠA
Amierykanskija ŚMI paviedamlajuć pra novuju kampaniju maštabnaha kibieršpijanažu Kitaja, hałoŭnymi mišeniami jakoj stali vysokapastaŭlenyja palityki i dziaržaŭnyja dziejačy ZŠA, uklučajučy novaabranaha prezidenta Donalda Trampa i jaho bližejšaje atačeńnie. Ataku ŭžo nazyvajuć «najhoršym uzłomam telekamunikacyj u historyi ZŠA».
24.11.2024 / 20:45
Ilustracyjnaja vyjava. Fota: pixabay
Pavodle źviestak telekanała CNN i vydańnia The New York Times, kitajskija chakiery mahli ŭzłamać telefony Donalda Trampa i jaho bližejšych prychilnikaŭ, vykarystoŭvajučy składanyja mietodyki ŭzłomu i sacyjalnaj inžynieryi. Metaj hetych atak było nie tolki atrymańnie kanfidencyjalnych źviestak, ale i mahčymaść adsočvać razmovy i pierasoŭvańni palitykaŭ.
Jak paviedamlaje FBR, padobnyja ataki mahli zakranuć jašče kala 150 vysokapastaŭlenych amierykanskich palitykaŭ i dziaržaŭnych słužačych. Paśla vyjaŭleńnia fakta ataki paciarpiełyja byli papiaredžany amierykanskimi śpiecsłužbami, što ich telefonnyja razmovy mahli być skampramientavanyja.
Kab ažyćciavić kradziež infarmacyi z pryład palitykaŭ, praŭradavyja kitajskija chakiery adnačasova ŭzłamali niekalki bujnych pravajdaraŭ suviazi ZŠA (AT&T, Verizon i Lumen), što, pavodle kamiteta Sienata ZŠA pa raźviedcy, stała «najhoršym uzłomam telekamunikacyj u historyi krainy», pieradaje CNN.
Kitajskija ŭłady, u svaju čarhu, admaŭlajuć datyčnaść da takich dziejańniaŭ. U zajavie Ministerstva zamiežnych spraŭ KNR havorycca, što abvinavačvańni źjaŭlajucca «častkaj infarmacyjnaj vajny, metaj jakoj jość dyskredytacyja Kitaja».
Amierykanskija śpiecyjalisty pa kibierbiaśpiecy padkreślivajuć, što padobnyja ataki nie tolki pahražajuć pryvatnamu žyćciu zvyčajnych hramadzian ZŠA, ale i staviać pad udar nacyjanalnuju biaśpieku. Amierykanskija ŭłady ŭžo raspačali šerah mier dla ŭzmacnieńnia kibierbiaśpieki, uklučajučy dadatkovyja sistemy abarony i ŭzmacnieńnie kantrolu nad uraźlivaściami ŭ telekamunikacyjach.
U ZŠA zaklikajuć panizić handlovy status Kitaja da ŭzroŭniu Biełarusi
Źlity mierkavany sakretny pratakoł sustrečy Trampa i Zialenskaha
ZŠA rassakrecili dakład ab palityčnych zabojstvach i zamachach, jakija adbyvalisia na zahad Pucina