ZŠA rassakrecili dakład ab palityčnych zabojstvach i zamachach, jakija adbyvalisia na zahad Pucina
Spravazdača amierykanskich śpiecsłužbaŭ analizuje vykarystańnie Rasijaj palityčnych zabojstvaŭ u jakaści dziaržaŭnaj palityki z samaha pačatku prezidenctva Uładzimira Pucina.
Ofis dyrektara Nacyjanalnaj raźviedki ZŠA raskryŭ źmiest kanfidencyjnaha dakładu ad 2016 hoda, u jakim aceńvajecca, nakolki šyroka rasijskija śpiecsłužby vykarystoŭvajuć praktyku palityčnych zabojstvaŭ za miažoj. U spravazdačy pieraličanyja zabojstvy, jakija, pa acency raźviedki ZŠA, mahli być ździejśnienyja rasijskimi śpiecsłužbami za miažoj u pieryjad z 1 studzienia 2000 hoda pa lipień 2016-ha.
Dakumient byŭ apublikavany ŭ ramkach amierykanskaha zakona ab svabodzie infarmacyi. Pry hetym častka infarmacyi ŭsio jašče ličycca sakretnaj, tamu dakumient byŭ apublikavany z častkovaj cenzuraj u vyhladzie čornych linij u niekalkich častkach tekstu.
Pieršym palityčnym zabojstvam za miažoj, pavodle dakładu, nazyvajecca padryŭ u Katary aŭtamabila Zielimchana Jandarbijeva, byłoha lidara Ičkieryi. Siarod inšych vypadkaŭ, jakija źviazvajucca z Kramlom, vyłučajucca atručeńni byłoha aficera FSB Alaksandra Litvinienki (Łondan, 2006 hod) i rasijskaha biznesmiena Alaksandra Pierapialičnaha (taksama ŭ Vialikabrytanii, 2012 hod).
Pad pahrozaj pieraśledu taksama znachodziacca palityčnyja i apazicyjnyja lidary ŭ byłych savieckich respublikach, ličycca ŭ dakładzie raźviedki ZŠA. Naprykład, vypadak z byłym prezidentam Ukrainy Viktaram Juščanka, jaki pieražyŭ atručeńnie ŭ 2004 hodzie, razhladajecca amierykanskimi śpiecsłužbami ŭ jakaści adnoj z rasijskich apieracyj na zahad Pucina.
Niełajalnyja Kramlu sieparatysty na ŭschodzie Ukrainy taksama stanavilisia mišeńniu Pucina, adznačajecca ŭ dakumiencie. U jakaści prykładu pryvodzicca zabojstva tak zvanaha «ministra abarony ŁNR» Alaksandra Biadnova (pazyŭny «Betmen») u 2015 hodzie.
Zhodna z acenkami amierykanskaj raźviedki, Pucin, chutčej za ŭsio, asabista sankcyjanuje zabojstvy vysokapastaŭlenych asob za miažoj. Aŭtary dakłada spasyłajucca na vysnovy aficyjnaha rasśledavańnia atručeńnia Litvinienki.
Akramia taho, u dakładzie skazana, što Pucin dazvoliŭ kiraŭniku Čačni Ramzanu Kadyravu pravodzić zabojstvy ŭradžencaŭ Čačni za miažoj. Zvyčajna takija zabojstvy ŭ vykanańni kadyraŭcaŭ supravadžajucca stralaninaj, u toj čas jak rasijskija śpiecsłužby vykarystoŭvajuć bolš składanyja mietady, uklučajučy atručeńni (časta) i dystancyjnyja vybuchi (redka), padkreślivajecca ŭ spravazdačy.
«My aceńvajem, što Rasija vałodaje mahčymaściami dla likvidacyi apanientaŭ z vykarystańniem chimičnych i bijałahičnych rečyvaŭ, zasnavanymi na daŭnich raspracoŭkach savieckaha pieryjadu. Hetyja namahańni dajuć Kramlu šyroki śpiektr instrumientaŭ dla ažyćciaŭleńnia takich apieracyj.
Maskva aktyŭna adsočvaje dysidentaŭ i pierabiežčykaŭ za miažoj, asabliva tych, chto, pavodle mierkavańnia Kramla, ujaŭlaje pahrozu dla jaho intaresaŭ», — padahulniaje dakład raźviedka ZŠA.
Bajpoł nazvaŭ imiony mahčymych zabojcaŭ Andreja Zielcara. I zajaviŭ, što siłavika «Nirvanu» zastreliŭ svoj ža6
Kamientary