rp.pl
Землятрус ва ўрадзе Польшчы. Прэм'ер Эва Копач заявіла пра шэраг адставак у выніку «скандалу з праслухоўваннем», паведамляюць польскія СМІ.
У адстаўку падалі шэраг міністраў, а таксама маршалак Сейма Радаслаў Сікорскі.
Заяўлена таксама пра адстаўку міністраў: аховы здароўя Барташа Арлуковіча, дзяржскарбу Владзімежа Карпінскага, спорту Анджэя Берната. Пра адстаўку заявілі віцэ-міністры: Рафал Баняк, Станіслаў Гаўлоўскі, Томаш Тамчыкевіч і прафесар Яцэк Растоўскі.
Улетку 2014 часопіс Wprost апублікаваў запісы незаконна праслуханых размоў высокапастаўленых польскіх чыноўнікаў у рэстаранах. На гэтых запісах Радаслаў Сікорскі, які быў у той час кіраўніком МЗС, называў шкоднымі саюзніцкія адносіны з ЗША, казаў аб нізкай самаацэнцы палякаў і скептычна выказваўся ў адрас прэм'ер-міністра.
Таксама ў ліку тых, каго праслухоўвалі, былі былы кіраўнік МУС Польшчы Бартламей Сянкевіч, старшыня Нацбанка Марэк Бэлька.
Праз год скандал разгарэўся па новай. Прадстаўнікі спецслужбаў пацвярджаюць, што гэта — найбуйнейшы выцек матэрыялаў следства ў гісторыі краіны.
