У мінскіх школах хочуць паставіць дзяжурных міліцыянтаў. Колькі на гэтым заробіць МУС?
Сталічныя чыноўнікі заняліся бяспекай у школах, адна з ідэй — каб у навучальных установах дзяжурылі супрацоўнікі Дэпартамента аховы МУС. Але ж у якую суму абыдзецца бюджэту горада такая інавацыя? «Наша Ніва» падлічыла.
Камітэт па адукацыі Мінгарвыканкама агучыў, што да 1 верасня ўсе дзіцячыя навучальныя ўстановы неабходна абсталяваць прапускнымі сістэмамі. Маюцца на ўвазе турнікеты, прычым мадэль такога абсталявання выбірае сама школа. Таксама ўсталююць дадатковыя відэакамеры. А ў перспектыве плануецца заключаць дагаворы з Дэпартаментам аховы МУС, каб супрацоўнікі ведамства дзяжурылі ў школах у дзённы час.
Але ж паслугі Дэпартамента аховы звычайна аплачваюцца. Прычым маюць вызначаны прэйскурант, які можна паглядзець на сайце МУС. Кругласуткавая міліцэйская ахова — «міліцыянт, адна адзінка» — каштуе 1736,26 рублёў за месяц ці 14,68 рублёў за гадзіну.
Правядзём прыблізныя падлікі. Калі будзе патрабавацца дзяжурства толькі ў дзённы час, то, напэўна, варта лічыць 12 гадзін працы міліцыі — з 8 раніцы па 8 вечара. Гэта каштуе 176,16 рублёў у дзень.
З улікам выходных і канікул у 2020/21 годзе школьнікі вучыліся трохі больш за 200 дзён за навучальны год. Акруглім да 200.
Атрымліваецца, адна школа заплаціць 35 232 рубля за год аховы.
Паводле звестак Белстата, на пачатак 2020/21 навучальнага году ў Мінску налічвалася 279 устаноў сярэдняй адукацыі. Памнажаем 279 на 35 тысяч — атрымліваецца 9 мільёнаў 765 тысяч рублёў. Столькі заплацяць мінскія школы за паслугі міліцыі.
Варта адзначыць, што падлікі прыблізныя. Магчыма, для школ увядуць іншыя расцэнкі альбо будуць дзейнічаць зніжкі.
Каментары