У Гомель нечакана прыляцела чырванакніжная сава
У адным з двароў Гомеля на дрэве заўважылі даўгахвостую кугакаўку. Мясцовыя арнітолагі расказалі, што рэдкая ў Беларусі птушка робіць у вялікім горадзе, у якім апошні і дагэтуль адзіны раз яна была зафіксаваная ў 2006 годзе.
Фота: Sputnik
«Тады справа была таксама па вясне, у Сельмашаўскім мікрараёне, птушка сядзела на снезе. Яе ўзялі ў кватэру, і на наступны дзень яна загінула. Пры аглядзе на шыі ў яе выявілі рваную рану. Той залёт чырванакніжніцы мы з калегамі назвалі выпадковым», — паведаміла ў каментары выданню Sputnik арнітолаг Зінаіда Гарошка.
Гэтым разам усё інакш. Птушка сядзіць высока на галіне дрэва, а гэта значыць, што дапамога ёй не патрэбная. Таму, на думку спецыяліста, турбаваць яе не трэба.
У горадзе сава апынулася, хутчэй за ўсё, у пошуках лёгкай здабычы — мышэй, пацукоў і іншых грызуноў.
«Сава пасядзіць да ночы і паляціць, так што не трэба адцягваць МНС і іншыя службы па дробязях», — адзначыла Гарошка.
Паводле слоў спецыяліста, з 1981 года даўгахвостая кугакаўка занесена ў Чырвоную кнігу Беларусі. Паблізу Гомеля няма месцаў яе гнездавання. Самае блізкае — паўночна-заходняя частка Магілёўскай вобласці. Таму з'яўленне рэдкай птушкі ў Гомелі можна назваць сенсацыяй.
«Гэты від соў распаўсюджаны ў лясах паўночнай Беларусі, чаго не скажаш пра Палессе. У 80-я гады мінулага стагоддзя яе занеслі ў спіс птушак Прыпяцкага нацыянальнага парку, але з 1999 года яна там ужо не лічыцца», — падзялілася інфармацыяй арнітолаг.
Чытайце таксама:
У мінскім парку думалі пабачыць нярэдкую саву, а пабачылі рэдкую
У Талачынскім раёне заўважылі вельмі рэдкую саву-бярозаўку
«Цяпер я маці барсукоў». Мінчанка пераехала на Палессе і стала правадніцай па дзікай прыродзе