Кіраўнік МЗС Літвы пра рашэнне Беларусі спыніць імпарт з Літвы: Гэта добраахвотныя санкцыі ў дачыненні да сябе
Габрыэлюс Ландсбергіс кажа, што з-за такога рашэння афіцыйнага Мінска ў беларусаў будзе менш магчымасцяў купляць прадукты харчавання або лекі, а для некаторых экспарцёраў гэта стане яшчэ адным сігналам да пошуку новых рынкаў, піша Delfi.lt.
Фота: Matthias Schrader / AP
«Найбольшы ўдар будзе па народзе Беларусі, па-іншаму гэта і не назавеш, як уведзеныя і ўжытыя супраць сябе санкцыі. У цэлым гэта вельмі невялікі, я б нават сказаў, дадатковы сігнал для нашых экспарцёраў да пошуку новых рынкаў, пра што мы гаворым ужо даўно», — журналістам у пятніцу сказаў Г.Ландсбергіс.
«Але тое, што ў народа Беларусі, які і без таго жыве бедна, будзе менш магчымасцяў купіць прадукты, лекі або іншыя неабходныя сродкі, тым цяжэй будзе іх жыццё — гэта ім падарыў іх дыктатар», — сказаў палітык.
У чацвер Беларусь абвясціла, што пачынае блакаваць імпарт розных тавараў з Літвы ў адплату за тое, што яе суседка закрыла яшчэ два памежныя пункты пропуску. Літва, дзе знайшлі прытулак многія актывісты беларускай апазіцыі, і з'яўляецца стойкім прыхільнікам Украіны, у пачатку сакавіка закрыла два кантрольна-прапускныя пункты.
Два іншыя кантрольна-прапускныя пункты былі зачыненыя па меркаваннях бяспекі ў мінулым годзе. Беларусь заявіла, што новая забарона на імпарт распаўсюджваецца на шырокі спектр тавараў, уключаючы прадукты харчавання і алкаголь, адзенне, бытавую тэхніку, аўтазапчасткі і будаўнічае абсталяванне.
Гэты крок «з'яўляецца адказам на пастанову Літвы спыніць паток тавараў, транспарту і людзей на двух памежных кантрольна-прапускных пунктах», паведамлялася ў заяве беларускага ўрада.
Чытайце таксама:
Беларусь увяла забарону на ўвоз шэрагу тавараў з тэрыторыі Літвы
Буйны перавозчык расказаў, што з аўтобусамі ў ЕС пасля закрыцця «Катлоўкі» і «Прывалкі»
Антырэкорд з пачатку года: 3175 фур чакаюць уезду ў ЕС
Вынікі апошняга апытання паказалі, што літоўцы прыхільна ставяцца да беларусаў