Беларусь увяла забарону на ўвоз шэрагу тавараў з тэрыторыі Літвы
Урад увёў забарону на ўвоз асобных тавараў праз беларуска-літоўскі ўчастак дзяржмяжы. Адпаведную пастанову падпісаў прэм'ер-міністр Беларусі Раман Галоўчанка, паведаміла прэс-служба ўрада.
Забарону ўвялі на перамяшчэнне праз пункты пропуску на беларуска-літоўскай мяжы шэрагу тавараў, што ўвозяцца для рэалізацыі на тэрыторыі Беларусі, незалежна ад краіны іх паходжання.
«Забароненыя да ўвозу для рэалізацыі і спажывання на тэрыторыі Беларусі наступныя тавары: воды, піва, віны, сусла вінаграднае, вермуты, напоі іншыя зброджаныя, спірт этылавы, воцат, шыны і пакрышкі пнеўматычныя гумовыя, адзенне і іншыя вырабы, якія былі ва ўжыванні, а таксама ўжываныя раней часткі і прылады транспартных сродкаў», — гаворыцца ў паведамленні.
Акрамя таго, Беларусь устанаўлівае забарону на імпарт з Літвы асобных тавараў, уключаючы прадукты харчавання, будаўнічыя вырабы і бытавую тэхніку.
«У прыватнасці, у названы пералік уключаныя асобныя тавары, якія паходзяць з Літоўскай Рэспублікі: малако і вяршкі згушчаныя, садавіна і арэхі, кава, сокі фруктовыя, воды, воцат, калготкі, панчохі, гольфы, шкарпэткі і іншыя панчошна-шкарпэткавыя вырабы, асобныя будаўнічыя вырабы, халадзільнікі і маразільнікі», — расказалі ў прэс-службе ўрада.
Праўда, названыя забароны не закранаюць тавары, якія ўвозяцца на тэрыторыю Беларусі для асабістага карыстання.
Гэтая пастанова падаецца як адказ на прынятае Літвой рашэнне аб спыненні руху тавараў, транспарту і людзей праз два памежныя пункты пропуску. Рашэнне беларускага ўрада пракаментавалі ў МЗС Беларусі.
«Гэта негатыўна адаб'ецца на працы шматлікіх літоўскіх лагістычных аператараў і прывядзе да адчувальнай страты іх даходаў у сувязі з істотным скарачэннем тавараабароту», — заявілі ў МЗС, адзначыўшы, што наступная на чарзе — Латвія.
Чытаецца таксама:
Буйны перавозчык расказаў, што з аўтобусамі ў ЕС пасля закрыцця «Катлоўкі» і «Прывалкі»
Антырэкорд з пачатку года: 3175 фур чакаюць уезду ў ЕС
Вынікі апошняга апытання паказалі, што літоўцы прыхільна ставяцца да беларусаў
Цяпер чытаюць
«Я сказаў на відэа, што мяне не катуюць — на той момант гэта было праўдай. А пасля мяне білі дзве гадзіны». Украінскі журналіст два гады правёў у расійскім палоне — вось што ён перажыў1
Каментары