Трамп пра Кубу: Я не думаю, што можна больш націснуць на Кубу, чым проста ўварвацца да іх і разнесці там усё

Са слоў прэзідэнта ЗША Дональда Трампа, сказаных у эфіры канала Salem News Channel, Куба знаходзіцца ў «сур’ёзнай бядзе», «вісіць на валаску» і блізкая да поўнага краху.

Дональд Трамп. За ягонай спінай — Марка Рубіа. Фота: AP Photo/Alex Brandon

Трамп таксама назваў кубінцаў «цвёрдымі і моцнымі людзьмі». Акрамя таго, ён згадаў пра кубінскае паходжанне дзяржсакратара ЗША Марка Рубіа.

«У Марка ёсць трохі кубінскай крыві. Думаю, Марка нядрэнна спраўляецца са сваёй працай. Куды б ён ні пайшоў, мы будзем паспяховыя», — заявіў Трамп.

Марка Рубіа таксама перад тым раскрытыкаваў Кубу, назваўшы кіраўніцтва краіны некампетэнтным. А ў Сенаце ЗША заяўлялі, што Куба будзе наступнай пасля Венесуэлы.

Сам жа Дональд Трамп раней заяўляў, што Куба знаходзіцца на мяжы краху і можа «вось-вось упасці». Паводле яго слоў, на гэты момант краіна амаль не мае крыніц даходу. Ён адзначыў, што раней Гавана значную частку фінансавых паступленняў атрымлівала дзякуючы пастаўкам нафты з Венесуэлы, але цяпер гэты канал фактычна страчаны.

Каментары да артыкула