У Добрушскім раёне ўпаў чарговы беспілотнік. Людзі чулі выбухі
Сёння пасля абеду каля пасёлка Рассвет Добрушскага раёна ўпаў невядомы беспілотнік, паведамляе выданне «Флагшток».
Фота ілюстрацыйнае
На месца здарэння прыбыла міліцыя і перакрыла рух па трасе Гомель — Навазыбкаў да прыезду групы размініравання. Да вывазу дрона на трасе ўтварылася доўгая чарга з аўтамабіляў, была спыненая праца АЗС «Беларуснафта», дзе таксама сабралася чарга.
Пасля беспілотнік быў вывезены, а рух адноўлены.
Каля 15:30 і 16:00 жыхары Добруша пачулі як быццам асобныя выбухі. Верагодна, сапёры падарвалі дрон недалёка ад горада.
На гэты момант тып беспілотніка і яго прыналежнасць застаюцца невядомымі.
Падчас расійска-ўкраінскай вайны на тэрыторыі Беларусі, асабліва на Гомельшчыне, нярэдка аказваюцца расійскія беспілотнікі, якія накіроўваюцца для атакі аб'ектаў ва Украіне. Некаторыя з іх падаюць на беларускай тэрыторыі. Пра падзенне аднаго з дронаў, які нібыта ўпаў на тэрыторыі Беларусі ў раку і параніў жанчыну, 13 сакавіка заявіў Аляксандр Лукашэнка. Ён сцвярджае, што гэты дрон быў украінскі.
Чытайце таксама:
Лукашэнка заявіў, што ўкраінскі беспілотнік упаў у раку і параніў жанчыну
Некалькі расійскіх дронаў заляталі на Гомельшчыну 26—27 студзеня — адзін упаў у Добрушы
Два расійскія дроны ўпалі ў Брагінскім раёне, адзін выбухнуў
У Жлобінскім раёне двухметровы дрон зваліўся за 30 метраў ад школы