Штрафы за прапаганду бяздзетнасці? «Хай сам нараджае»
Сабралі меркаванні звычайных беларусаў пра штрафы «за прапаганду бяздзетнасці».
У Беларусі прынялі змены ў Кодэкс аб адміністрацыйных правапарушэннях. Самай рэзананснай часткай новаўвядзенняў стала ўвядзенне адказнасці за «прапаганду нетрадыцыйных сэксуальных адносін, змены полу, бяздзетнасці і педафіліі».
Парушальнікам-фізічным асобам пагражае штраф да 20 базавых велічынь (900 рублёў), індывідуальным прадпрымальнікам — да 100 базавых (4500 рублёў), а юрыдычным асобам — да 150 базавых велічынь (6750 рублёў).
Гэтая навіна выклікала бурную рэакцыю ў сацыяльных сетках. Адпаведнае відэа ў TikTok ужо набрала больш за паўмільёна праглядаў.
«Наяўнасць дзяцей — гэта асабістая справа кожнай сям'і», — адзначае адзін з карыстальнікаў. Яго каментар лайкамі падтрымалі больш за 2700 чалавек.
Беларусы і беларускі актыўна тлумачаць прычыны, чаму яны не спяшаюцца заводзіць дзяцей. У першую чаргу людзі наракаюць на матэрыяльныя цяжкасці:
«Дык калі няма грошай на забеспячэнне дзіцяці, што мне рабіць?»
«Хачу дзіця, але няма свайго жылля і сродкаў, каб яго забяспечыць. Дасце?»
«Танней штраф плаціць, чым утрымліваць дзіця».
«Самая магутная прапаганда бяздзетнасці — гэта цэны на жыллё».
«З такімі супрацьзачаткавымі заробкамі і цэнамі на жыллё ніякай прапаганды не трэба!»
Некаторыя каментатары звяртаюць увагу на стан здароўя:
«Мне хутка 37, куча праблем са здароўем, сама ледзь жывая, якое дзіця? Ды і нарадзіць не магу».
«У мяне праблема са здароўем, і лекары забаранілі мне нараджаць, нават цяжараць нельга і мне пашанцавала. Сказалі: жыві для сябе і ахоўвайся, я так і раблю. І я вельмі рада, што мне забаронена і нельга».
Беларусы таксама прапаноўваюць свае рашэнні праблемы:
«Тады няхай павышаюць заробкі. У наш час нават кватэру нармальна купіць не атрымаецца, а забяспечваць дзяцей будзе яшчэ складаней».
«Дайце грошай, і я збудую сям'ю».
Іншыя задаюцца рытарычнымі пытаннямі: «Няўжо ўсё так дрэнна ў бюджэце?», «Да чаго дакаціліся?», «Ды што ж гэта пачынаецца?».
Многія проста канстатуюць:
«Неяк гэта ўсё няправільна».
Нехта замест слоў апублікаваў малюнак.
Гучаць і рэзкія заўвагі:
«Лукашэнка няхай сам нараджае» (130 лайкаў).
«Можа, прыпыніць працу парламента? Раптам яны стаміліся і мазгі ў іх не працуюць????»
«Ды хопіць ужо… адчапіцеся ад людзей!» — піша адзін з карыстальнікаў.
Чытайце таксама:
«Трава твая, а пясок дзяржаўны!» Беларусы абураныя штрафамі за «крадзеж» пяску
«На Каменнай Горцы жыву. Спала выдатна». Пад ролікі пра дрон нагналі тых самых ботаў