Новае даследаванне паказала, што пагроза ад здзічэлых катоў у Аўстраліі была моцна недаацэненая

Навукоўцы з Універсітэта Новага Паўднёвага Уэльса высветлілі, што здзічэлыя каты ў Аўстраліі знішчаюць значна больш відаў жывёл, чым лічылася раней, піша The Independent.

Здымак ілюстрацыйны. Фота: magnific.com

За апошнія 250 гадоў на кантыненце зніклі больш за 40 відаў сысуноў, а яшчэ каля 700 відаў знаходзяцца пад пагрозай вымірання. Прыкладна 200 з іх непасрэдна цярпяць праз здзічэлых катоў, нароўні з высяканнем лясоў, іншымі чужароднымі драпежнікамі і хваробамі.

Ранейшыя даследаванні паказвалі, што здзічэлыя каты штогод забіваюць каля 1,5 мільярда жывёл у Аўстраліі. Аднак новая работа паказала, што гэтыя ацэнкі былі заніжаныя: каты могуць знішчаць удвая больш відаў сысуноў і ўтрая больш відаў птушак, чым меркавалася.

Раней навукоўцы вывучалі рацыён катоў па рэштках у страўніках і экскрэментах — костках, поўсці, пёрах і іншых бачных слядах здабычы. Але дробныя жывёлы хутка ператраўліваюцца, таму многія ахвяры заставаліся незаўважанымі.

У новым даследаванні выкарысталі метад судова-генетычнага аналізу. Ён дазваляе знаходзіць нават вельмі дробныя фрагменты ДНК з'едзеных жывёл і дакладна вызначаць іх віды. Дзякуючы гэтаму даследчыкі выявілі ў рацыёне здзічэлых катоў значна больш відаў здабычы, у тым ліку рэдкіх мяккацелых жаб.

Навукоўцы заклікаюць ствараць спецыяльныя агароджаныя тэрыторыі для абароны рэдкіх відаў. Такія «бяспечныя гавані» могуць абараніць жывёл не толькі ад дзікіх катоў, але і ад лісаў ды трусоў, дапамагаючы захаваць унікальную аўстралійскую прыроду.

Каментары да артыкула