Якія грыбы і ягады найбольш назапашваюць радыенукліды?

Грыбы праз свае біялагічныя асаблівасці добра паглынаюць цэзій-137 і значна больш інтэнсіўна назапашваюць радыенукліды, чым іншыя лясныя расліны. Колькасць цэзію-137 у грыбах заўсёды вышэйшая, чым у глебе, на якой яны растуць. 

Здымак ілюстрацыйны. Фота: «Наша Ніва»

Паводле здольнасці назапашваць радыенукліды грыбы падзяляюцца на чатыры групы.

Да слабых назапашвальнікаў адносяцца апенькі, порхаўкі жамчужныя, шампіньёны і страчкі звычайныя.

Сярэдне назапашваюць сыраежкі, бабкі, лісічкі, баравікі і падасінавікі.

Да грыбоў, якія моцна назапашваюць радыенукліды, адносяцца грузды, рыжыкі, ваўнянкі і зялёнкі.

Найбольшай здольнасцю да назапашвання характарызуюцца польскія грыбы, свінушкі, маслякі і махавікі.

У шапачках грыбоў канцэнтрацыя радыенуклідаў звычайна ў 1,5—2 разы вышэйшая, чым у ножках. Асабліва гэта характэрна для баравікоў, бабак, падасінавікаў і польскіх грыбоў. Выразнай розніцы паміж маладымі і старымі грыбамі па колькасці цэзію-137 не адзначаецца. Аднак рэкамендуецца збіраць маладыя грыбы, паколькі ў старых могуць назапашвацца таксічныя рэчывы.

Сярод дзікарослых ягад здольнасць назапашваць цэзій-137 павялічваецца ў такой паслядоўнасці: каліны, рабіны, суніцы, ажыны, маліны, брусніцы, буякі. Найбольш радыенуклідаў назапашваюць журавіны і чарніцы.

Пры аднолькавых умовах росту чарніцы могуць назапашваць цэзію-137 у 2—3 разы больш, чым маліны і суніцы.

Каментары да артыкула