У санаторый пад Маладзечнам завезлі на лячэнне «ветэранаў СВА»

У санаторыі «Вяжуці» пад Маладзечнам праходзяць лячэнне ўдзельнікі вайны супраць Украіны з акупаванай Херсонскай вобласці, якіх у Расіі называюць «ветэранамі СВА», заўважылі праваабаронцы з Mayday.team.

У верасні херсонскі філіял расійскага фонду «Абаронцы Айчыны» накіраваў у Беларусь на лячэнне як мінімум аднаго ўдзельніка баявых дзеянняў, а таксама некалькіх членаў сем’яў загінулых і зніклых без вестак вайскоўцаў.

Урад Херсонскай вобласці публікуе фатаграфіі «ветэрана СВА» Леаніда Логвіна, які страціў нагу падчас вайны супраць Украіны. Лячэнне ў Беларусі ён называе магчымасцю «аднавіцца і зноў адчуць смак жыцця».

Першая група з Херсонскай вобласці праходзіла лячэнне ў гэтым жа самым санаторыі ў сакавіку гэтага года. Тады ў яе ўваходзілі трое расійскіх вайскоўцаў і жонка загінулага вайскоўца.

Санаторый «Вяжуці» спецыялізуецца на лячэнні захворванняў касцява-мышачнай і сардэчна-сасудзістай сістэм, а таксама на рэабілітацыі людзей з парушэннямі функцый апорна-рухальнага апарату.

Каментары да артыкула