На Гомельшчыне будуюць кацельні, якія будуць працаваць на пелетах

У Васілевічах Рэчыцкага раёна Гомельскай вобласці плануюць пабудаваць кацельню, якая будзе працаваць на мясцовых відах паліва. На будаўнічыя і мантажныя работы, пусканаладачныя работы і пастаўку абсталявання збіраюцца выдаткаваць да 2 мільёнаў 232 тысяч рублёў, або больш за 741 тысячу даляраў. Грошы выдзеліць з уласных сродкаў заказчык — «Гомельаблцепласетка», піша «Флагшток».

Дзейная кацельня ў Рэчыцкім раёне

Асноўныя работы павінны пачацца ў лістападзе 2026 года і завяршыцца да сярэдзіны ліпеня 2027-га.

У дакументацыі не ўдакладняецца, якія менавіта віды мясцовага паліва будуць выкарыстоўвацца. Аднак у даведцы Рэчыцкага райжылкамгаса пра планы на 2026 год згадваецца будаўніцтва дзвюх кацельняў на драўняных паліўных гранулах — пелетах. Адна з іх павінна з’явіцца ў горадзе Васілевічы, другая — у аграгарадку Бабічы.

У Бабічах будаўніцтва пелетнай кацельні ўжо набліжаецца да завяршэння. Паводле справаздачы Гомельскага абласнога ўпраўлення па наглядзе за рацыянальным выкарыстаннем паліўна-энергетычных рэсурсаў, у верасні 2026 года там упарадкоўвалі тэрыторыю, падключалі інжынерныя сеткі і наладжвалі абсталяванне.

Будаўніцтва кацельні ў Бабічах

У райжылкамгасе заявілі, што выкарыстанне пелетаў дазволіць павысіць энергаэфектыўнасць цеплазабеспячэння, знізіць сабекошт цеплавой энергіі і зрабіць сістэму больш надзейнай.

У Гомельскай вобласці працуюць тры буйныя заводы па вытворчасці пелетаў, якія ўваходзяць у сістэму Міністэрства лясной гаспадаркі. Заводы ў Мазыры і Жыткавічах, адкрытыя ў 2020 годзе, раней прастойвалі праз санкцыі і расійскую вайну. Першапачаткова іх прадукцыю планавалі пастаўляць у Еўрасаюз, каб атрымліваць валютную выручку, але ў выніку вытворцам давялося пераарыентавацца на ўнутраны рынак.

Мяркуецца, што гэтыя заводы могуць пастаўляць паліва для новых кацельняў у Рэчыцкім раёне. Афіцыйныя звесткі пра працу пелетных прадпрыемстваў Гомельшчыны даўно не абнаўляліся. Паводле меркавання «Флагштока», яны, відаць, працягваюць працаваць пераважна на ўнутраны рынак.

Каментары да артыкула