Найлепш у Беларусі цяпер акупляюцца аперацыі з нерухомасцю

У Беларусі і Мінску найбольшую рэнтабельнасць продажаў у 2026 годзе дэманструе сфера аперацый з нерухомасцю. Гэта відаць з вынікаў працы эканомікі за першыя восем месяцаў года, піша выданне banki24.by.

Здымак ілюстрацыйны. Фота: Lookby.media

Рэнтабельнасць продажаў паказвае, якую долю ў выручцы прадпрыемства складае прыбытак.

Паводле гэтага паказчыка ў Беларусі найбольш рэнтабельнымі былі наступныя галіны: аперацыі з нерухомай маёмасцю — 22,5%, прафесійная, навуковая і тэхнічная дзейнасць — 17,9%, інфармацыя і сувязь — таксама 17,9%, фінансавая і страхавая дзейнасць — 11,8%, адміністрацыйныя і дапаможныя паслугі — 10,6%, апрацоўчая прамысловасць — 10,4%, будаўніцтва — 10,1%.

У Мінску за той жа перыяд рэнтабельнасць аперацый з нерухомасцю склала 25,2%. На другім месцы апынулася прафесійная, навуковая і тэхнічная дзейнасць з паказчыкам 19,2%, на трэцім — інфармацыя і сувязь, дзе рэнтабельнасць дасягнула 19,1%.

У сталіцы таксама высокія паказчыкі зафіксаваныя ў сельскай гаспадарцы і сферы адміністрацыйных і дапаможных паслуг — па 12,7%, энергетычным сектары — 12,5%, а таксама фінансавай і страхавой дзейнасці — 11,6%.

Такім чынам, рэйтынгі найбольш рэнтабельных галін Беларусі і Мінска ў асноўным супадаюць. У абодвух выпадках першыя тры месцы займаюць галіны сферы паслуг.

Рэнтабельнасць продажаў разлічваецца як суадносіны прыбытку ад рэалізацыі прадукцыі, тавараў, работ і паслуг да выручкі ад іх рэалізацыі. Калі фінансавы вынік ад рэалізацыі адмоўны, прадпрыемства працуе са стратамі.

Каментары да артыкула