«Дзіяна выпіла шэсць бляшанак энергетыку і папрасілася за руль». Дэталі катастрофы ў Вілейскім раёне, дзе загінула трое маладзёнаў
Дзяўчына вучылася ў аўташколе, але пасведчання кіроўцы яшчэ не мела.
У той злашчасны вечар у Volkswagen Polo селі Дзіяна Дземідовіч (свой 18 дзень нараджэння яна адсвяткавала толькі 1 кастрычніка), 19‑гадовы Аляксей Якубовіч і 21‑гадовы Максім Фядотаў.
Аляксей з мястэчка Крывічы Мядзельскага раёна, там адвучыўся ў школе. Сёлета скончыў Вілейскі дзяржаўны каледж — менавіта там вучылася і Дзіяна. Яго збіраліся забраць у армію, але не склалася, пайшоў працаваць механізатарам у аграгарадок Сваткі, дзе знаходзіцца аднайменны калгас.
Аляксей Якубовіч
Максіму Фядотаву быў 21 год. Нарадзіўся ён у аграгарадку Старыца Капыльскага раёна. Мяркуючы па сацсетках, скончыў Беларускую сельскагаспадарчую акадэмію. Працаваў разам з Аляксеем — толькі на пасадзе агранома.
Знаёмыя кажуць, што Максім ужо трапляў у ДТЗ — але на матацыкле. Атрымаў даволі цяжкія траўмы і апынуўся на бальнічным ложку.
На вечар 27 кастрычніка ў тройцы былі немудрагелістыя планы — хацелі проста пакатацца.
Volkswagen Polo, на якім маладыя людзі трапілі ў ДТЗ, наколькі вядома, належаў брату Максіма.
Знаёмыя сцвярджаюць, што алкаголь у той вечар кампанія не спажывала. Пра Аляксея кажуць, што ён быў вельмі прынцыповым у гэтым пытанні. Ніколі не піў, калі збіраўся пакатацца — і іншым не дазваляў. Казаў, што калі спыніць ДАІ, дык лепш быць бяспраўнікам, чым п'яным.
Дзіяна Дземідовіч
Сябры кампаніі расказваюць, што ўвечары перад аварыяй Дзіяна выпіла шэсць бляшанак энергетыку.
Дзяўчына вучылася ў аўташколе, але пасведчання кіроўцы яшчэ не мела.
Знаёмыя кажуць, што гэта не перашкаджала ёй ездзіць на чужых машынах на месцы кіроўцы: «Яна заўсёды прасіла пусціць яе за руль». Нічога крамольнага знаёмыя ў такіх просьбах не бачылі і перыядычна давалі Дзіяне паруліць.
Каля 20:40 на 104‑м кіламетры Р-28 Мінск — Маладзечна — Нарач на закругленні дарогі ўправа дзяўчына вылецела на сустрэчную паласу і сутыкнулася з Mitsubishi.
Фота: МУС
Трое сяброў на Volkswagen загінулі, кіроўца Mitsubishi трапіў у бальніцу.
Чытайце таксама:
У машыны лопнула кола падчас руху па МКАД
У Клецкім раёне кіроўца легкавіка загінуў, урэзаўшыся ў фуру