Махляры нагрэлі двух мужчын на 101 чырвонай ружы
44‑гадовы мінчук стаў ахвярай інтэрнэт-махлярства, калі паспрабаваў дапамагчы знаёмаму набыць букет для жонкі. Мужчына перавёў 230 рублёў за 101 чырвоную ружу, але кветкі так і не былі дастаўленыя.
Здымак ілюстрацыйны. Фота: magnific.com
У Маскоўскае РУУС Мінска звярнуўся пацярпелы і расказаў, што яму напісаў знаёмы, які знаходзіўся ў замежнай камандзіроўцы. Той папрасіў дапамагчы аплаціць букет для жонкі на дзень нараджэння, бо ў яго ўзніклі праблемы з банкаўскай карткай.
Спачатку мінчук адмовіўся, бо не меў вольных грошай. Тады знаёмы прапанаваў іншы варыянт: ягоная жонка нібыта пазычыць заяўніку 230 рублёў, якія той павінен будзе пераслаць па рэквізітах, дасланых сябрам.
Мужчына атрымаў грошы, перавёў іх на пазначаныя рэквізіты і адправіў знаёмаму чэк. Аднак праз тры дні той зноў выйшаў на сувязь і паведаміў, што букет так і не даставілі, а інтэрнэт-крама перастала адказваць на паведамленні.
Па факце здарэння завялі крымінальную справу за махлярства.
Чытайце таксама:
20‑гадовая дзяўчына ўзяла адпачынак за свой кошт і стала кур'ерам тэлефонных махляроў
У Беларусі сталі часцей разлічвацца «цублямі» і «дублямі»
«Куфар» абнавіў правілы: цяпер перапіскі будуць кантраляваць — каб перамагчы махляроў