УСУ ўдарылі па вытворцы ракетнага паліва ў Растоўскай вобласці

У ноч на суботу, 31 кастрычніка, Сілы абароны Украіны нанеслі ўдар па прадпрыемстве расійскага вайскова-прамысловага комплексу — камбінаце «Каменскі» ў горадзе Каменск-Шахцінскі Растоўскай вобласці Расіі. Пра гэта паведаміў Генеральны штаб Узброеных сіл Украіны.

Фота: NASA

На гэтым прадпрыемстве вырабляюць цвёрдае ракетнае паліва для боепрыпасаў рэактыўных сістэм залпавага агню «Ураган», «Смерч» і «Тарнада-С», а таксама для шэрагу ракетных комплексаў і авіяцыйных сродкаў паражэння.

Паводле паведамлення Генштаба УСУ, для атакі выкарысталі ўдарныя беспілотнікі і берагавыя ракетныя комплексы ВМС Украіны «Нептун». У выніку ўдару загарэўся склад гатовай прадукцыі, а таксама былі пашкоджаныя чатыры вытворчыя цэхі.

Ва ўкраінскім Генштабе адзначылі, што ўдары па вытворчасці цвёрдага ракетнага паліва зніжаюць магчымасці расійскай арміі абстрэльваць украінскія населеныя пункты з рэактыўных сістэм залпавага агню.

Акрамя таго, украінскія вайскоўцы паведамілі пра паражэнне чатырох складоў матэрыяльна-тэхнічных сродкаў расійскіх войскаў на акупаваных тэрыторыях. Яны знаходзіліся ў раёнах Харцызска і Дакучаеўска ў Данецкай вобласці, Новавасілеўкі ў Запарожскай вобласці і Новаайдара ў Луганскай вобласці.

Каментары да артыкула