Кіеў аднавіў інтэнсіўныя ўдары па расійскіх НПЗ пасля таго, як Вашынгтон праігнараваў яго патрабаванні

Узброеныя сілы Украіны другі дзень запар атакуюць расійскія нафтаперапрацоўчыя заводы (НПЗ) пасля двухтыднёвай паўзы. Кіеў часова абмежаваў удары пад ціскам Дональда Трампа, аднак Расія працягнула атакаваць украінскую энергетыку, а ЗША не прынялі ўкраінскія ўмовы спынення атак. Новая серыя ўдараў пачалася непасрэдна перад выбарамі ў ЗША і чаканымі трохбаковымі перамовамі, піша «Агенцтва».

Сёння ва Уфе атакаваны НПЗ. Напярэдадні Украіна атакавала Навакуйбышаўскі НПЗ «Раснафты». Яшчэ адзін пажар узнік побач з нафтабазай «Раснафты» каля Шарамецьева.

Да гэтага Кіеў не наносіў удараў па расійскіх НПЗ з 15 кастрычніка, калі быў пашкоджаны Разанскі завод.

Зацішша пачалося на фоне патрабаванняў Дональда Трампа спыніць атакі на НПЗ. Прэзідэнт ЗША звязвае ўдары па іх з ростам цэн на дызельнае паліва ў ЗША.

11 кастрычніка Трамп абвясціў, што Расія і Украіна дамовіліся неадкладна спыніць узаемныя ўдары па энергетычных аб'ектах.

І хоць гэта зноў не было ўзгоднена з Масквой і Кіевам, Украіна заявіла пра гатоўнасць падтрымаць перамір'е, пасля чаго Кіеў тры дні не атакаваў расійскія НПЗ. Расійскія ўдары па ўкраінскіх энергетычных аб'ектах працягваліся, і 15 кастрычніка Зяленскі заявіў, што «з нас хопіць».

У той жа дзень быў нанесены ўдар па Разанскім НПЗ, але пасля гэтага зноў наступіла паўза на некалькі тыдняў.

Паводле звестак The Wall Street Journal, яшчэ ў сярэдзіне кастрычніка ўкраінскім падраздзяленням далёкіх удараў паведамілі пра фактычнае спыненне атак на НПЗ пасля завяршэння ўжо пачатых аперацый.

На перыяд паўзы прыпала яшчэ некалькі падзей, якія маглі паўплываць на тактыку паветраных удараў УСУ.

З 14 да 24 кастрычніка ўкраінскія вайскоўцы сутыкнуліся з праблемамі ў працы тэрміналаў Starlink, а 20—21 кастрычніка адбыўся новы раўнд перамоў з удзелам амерыканскіх перамоўшчыкаў Стыва Уіткафа і Джарэда Кушнера (апошні ўдзельнічаў па відэасувязі). Кушнер наўпрост запатрабаваў ад Зяленскага 30‑дзённага спынення атак як жэсту падзякі ЗША за пасярэдніцтва, пісала WSJ.

 За час паўзы Зяленскі агучыў некалькі ўмоў, пры выкананні якіх Кіеў гатовы адмовіцца ад удараў па расійскіх НПЗ ва ўмовах працяглых расійскіх атак на энергетычную інфраструктуру Украіны: дазвол на выкарыстанне Starlink над тэрыторыяй Расіі; перадача ракет Patriot. Ніводная з гэтых умоў не была выкананая.

У пятніцу ЗША ўхвалілі продаж Украіне 500 ракет Patriot PAC-3 на суму 2,1 млрд долараў за кошт сродкаў Украіны і яе партнёраў. Аднак ракеты яшчэ не вырабленыя, і іх пастаўкі могуць пачацца толькі праз некалькі гадоў.

Паводле звестак WSJ, некаторыя еўрапейскія саюзнікі раілі Украіне дачакацца амерыканскіх выбараў, але Кіеў аднавіў атакі раней.

Яны аднаўляюцца напярэдадні трохбаковых перамоў Расіі, Украіны і ЗША і могуць узмацніць пазіцыю Кіева: за час паўзы расійскія НПЗ павялічылі перапрацоўку нафты прыкладна на чвэрць.

Рэакцыі Трампа пакуль няма. Мяркуецца, што сваю заяву ён будзе рабіць ва ўмовах, калі амерыканскія кампаніі адмаўляюцца купляць паліва, адпраўленае ў рамках дызельнай здзелкі з Масквой.

У чацвер The Washington Sun паведаміла, што бізнэс асцерагаецца рэпутацыйных і юрыдычных наступстваў: указа Трампа і дазволу Міністэрства фінансаў ЗША можа быць недастаткова для зняцця санкцый, уведзеных Кангрэсам.

Раней Дзмітрый Пяскоў заявіў, што ўдары па расійскіх НПЗ не ставяць пад сумнеў правядзенне перамоў.

• 9
• 0
• 0
• 0
• 0
• 0
• 0
• 1