Украінскія беспілотнікі пачалі часцей атакаваць расійскія металургічныя прадпрыемствы пасля таго, як адміністрацыя Дональда Трампа дамаглася ад Кіева прыпынення ўдараў па нафтаперапрацоўчых заводах, пагражаючы адключыць Украіне доступ да даных Starlink, піша The Moscow Times.
З пачатку 2026 года да сярэдзіны кастрычніка Узброеныя сілы Украіны не менш за 114 разоў атакавалі расійскія НПЗ. Паводле інфармацыі The Moscow Times, гэта прывяло да скарачэння аб'ёмаў перапрацоўкі нафты ў Расіі прыкладна на траціну і выклікала паліўны крызіс у розных рэгіёнах краіны — ад Сібіры да Масквы.
У кастрычніку пасля абвяшчэння Трампам «энергетычнага перамір'я» ўдары па НПЗ спыніліся. Апошнімі сярод такіх аб'ектаў былі атакаваныя завод у Разані 15 кастрычніка і прадпрыемства ў Сургуце 16 кастрычніка.
Новымі цэлямі ўкраінскіх беспілотнікаў сталі металургічныя прадпрыемствы. 26 кастрычніка пад удар трапіў Якаўлеўскі горна-ўзбагачальны камбінат, які ўваходзіць у кампанію «Северсталь» мільярдэра Аляксея Мардашова. Прадпрыемства, якое забяспечвае кампанію сыравінай з Якаўлеўскага радовішча, часткова засталося без электрычнасці. Работнікаў шахты давялося падымаць на паверхню. Пасля папярэдняй атакі ў пачатку кастрычніка камбінат ужо быў вымушаны працаваць у абмежаваным рэжыме.
У ноч на 28 кастрычніка пад атаку трапіў Наваліпецкі металургічны камбінат, які належыць мільярдэру Уладзіміру Лісіну. Гэта найбуйнейшы металургічны завод Расіі, на долю якога прыпадае каля 20% вытворчасці сталі ў краіне. Паводле звестак OSINT-каналаў, па прадпрыемстве ўдарылі ракетамі Storm Shadow. На заводзе ўзнік пажар.
Новыя атакі могуць пагоршыць становішча расійскай металургічнай галіны, якая ўжо і так перажывае сур'ёзны крызіс. Пасля ўвядзення заходніх санкцый вытворцы страцілі каля траціны экспартных рынкаў. Адначасова ў Расіі знізіўся ўнутраны попыт на метал праз спад у будаўніцтве, запаволенне эканомікі і высокія крэдытныя стаўкі.
Праз цяжкасці са збытам металургічныя кампаніі летась скарацілі выплаўку сталі да найніжэйшага ўзроўню за 15 гадоў. У студзені — маі 2026 года вытворчасць зменшылася яшчэ на 8,4% у параўнанні з аналагічным перыядам мінулага года і склала 26,6 мільёна тон.
Аналітыкі сэрвіса «СберИнвестиции» назвалі сітуацыю ў галіне беспрэцэдэнтным крызісам, адзначыўшы працягласць і глыбіню падзення. За першае паўгоддзе 2026 года чысты прыбытак Наваліпецкага камбіната знізіўся больш чым удвая — з 45,6 да 21 мільярда рублёў. У «Северсталі» ён скараціўся ў дзевяць разоў, да 4,12 мільярда рублёў. Магнітагорскі металургічны камбінат за той жа перыяд атрымаў чыстыя страты ў памеры 19,1 мільярда рублёў, а яго выручка зменшылася на 10%.
Аналітыкі «Сбера» папярэджвалі, што ў 2026 годзе прыбытак расійскіх сталеліцейных прадпрыемстваў можа апусціцца да найніжэйшага ўзроўню за некалькі дзесяцігоддзяў.
Цяпер чытаюць
Віцебскі вядучы пажартаваў на закрытым мерапрыемстве. Праз дзве гадзіны да яго прыехала міліцыя праз данос8
Віцебскі вядучы пажартаваў на закрытым мерапрыемстве. Праз дзве гадзіны да яго прыехала міліцыя праз данос
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1414
Каментары