Хутчэйшага разгляду заяў на польскі ДНЖ беларусам чакаць не варта, але тэрмін дзеяння праязных дакументаў могуць падоўжыць

На чарговай сустрэчы працоўнай групы па пытаннях грамадзян Беларусі пры польскай Установе ў справах чужаземцаў абмеркавалі тры важныя навіны для беларусаў, якія легалізуюцца ў Польшчы.

Фота ілюстрацыйнае

Арганізатарамі сустрэчы былі прадстаўнікі Аб'яднанага пераходнага кабінета, у тым ліку Павел Латушка. Удзельнічалі таксама прадстаўніца Кабінета па сацыяльнай палітыцы Вераніка Станкевіч, юрыст Народнага антыкрызіснага ўпраўлення Міхаіл Кірылюк, юрыстка ў галіне легалізацыі знаходжання і працаўладкавання замежнікаў у Польшчы Вольга Дабравольская.

Вольга Дабравольская падзялілася ў фэйсбуку ўласнымі назіраннямі па выніках сустрэчы:

«Па-першае, хуткага скарачэння тэрмінаў разгляду заяў на атрыманне дазволу на жыхарства чакаць пакуль не варта.

Укараненне сістэмы MOS (модуля абслугоўвання спраў) не прывяло да чаканага паляпшэння сітуацыі. Асабліва складанае становішча захоўваецца ў буйных ваяводствах — Мазавецкім, Ніжнесілезскім і Паморскім. Паводле звестак, у Мазавецкім ваяводскім упраўленні на разглядзе знаходзіцца больш за 190 тысяч спраў. Не выключана, што тэрміны чакання будуць і далей павялічвацца.

Таму, адзначае Вольга Дабравольская, пры планаванні легалізацыі важна ўлічваць рэальную сітуацыю ў канкрэтным ваяводстве і не адкладаць падачу дакументаў на апошні момант.

Па-другое, справы аб наданні міжнароднай абароны будуць разглядацца індывідуальна з улікам сітуацыі ў Беларусі ў 2026 годзе.

Упраўленне мае намер ацэньваць не толькі агульнае становішча ў краіне, але і тое, ці захоўваецца для канкрэтнага заяўніка рызыка пераследу.

Гэта азначае, што пры падачы заявы недастаткова спасылацца толькі на падзеі 2020—2022 гадоў або агульную сітуацыю ў Беларусі. Неабходна патлумачыць, чаму асцярогі адносна вяртання застаюцца актуальнымі цяпер, якія абставіны сведчаць пра індывідуальную пагрозу і чаму яна захоўваецца на момант разгляду заявы і прыняцця рашэння.

Акрамя таго, у працэдуру разгляду спраў аб міжнароднай абароне вяртаюцца асабістыя апытанні заяўнікаў. Яны могуць быць даволі падрабязнымі, таму Дабравольская раіць загадзя да іх рыхтавацца.

Па-трэцяе, з месца зрушыўся разгляд пытання аб падаўжэнні тэрміну дзеяння праязных дакументаў.

Праца ў гэтым кірунку ўжо пачалася. Завяршыць яе да канца 2026 года, хутчэй за ўсё, не атрымаецца, аднак ёсць падставы разлічваць, што ў пачатку 2027‑га працэс пяройдзе ў больш актыўную і прадметную фазу. Для гэтага яшчэ трэба будзе выканаць значны аб'ём працы, у тым ліку правесці неабходныя абмеркаванні з польскім парламентам. Пасля таго тэрмін дзеяння польскіх праязных дакументаў можа быць падоўжаны з аднаго года да двух».

Каментары да артыкула