Малдова ў перамовах аб уступленні ў ЕС ужо ў наступным годзе можа дагнаць Чарнагорыю

Малдова можа дасягнуць такога ж узроўню ў перамовах аб уступленні ў Еўрапейскі саюз, якога цяпер дасягнула Чарнагорыя, ужо ў 2027 годзе. Гэта магчыма, калі краіна захавае цяперашнія тэмпы рэформаў. Пра гэта заявіла еўракамісарка па пытаннях пашырэння Марта Кос падчас выступу ў Кішынёве, піша «Еўрапейская праўда».

Здымак ілюстрацыйны. Фота: AP Photo/Vadim Ghirda

Марта Кос адзначыла, што даклад аб пашырэнні ЕС за 2026 год пацвярджае значны прагрэс Малдовы, дасягнуты нягледзячы на беспрэцэдэнтны знешні ціск.

Кос таксама паведаміла, што чакае ад Рады ЕС ухвалення адкрыцця двух апошніх перамоўных кластараў. Паводле яе слоў, да канца 2026 года могуць з'явіцца новыя станоўчыя навіны, бо Еўракамісія разлічвае атрымаць зялёнае святло на пачатак перамоў па гэтых кірунках.

Акрамя таго, Еўракамісія завяршае падрыхтоўку станоўчай ацэнкі выканання Малдовай так званых фундаментальных крытэрыяў IBAR. Як патлумачыла Кос, такая ацэнка адкрые шлях да закрыцця асобных перамоўных раздзелаў і стане важным этапам у працэсе далучэння да ЕС.

Еўракамісарка падкрэсліла, што 2027 год будзе вырашальным для дасягнення вынікаў. Калі Малдова захавае цяперашнія тэмпы рэформаў, яна зможа закрыць да 25 перамоўных раздзелаў.

Гэта дазволіць краіне наблізіцца да становішча Чарнагорыі, якая цяпер знаходзіцца на заключным этапе перамоў аб уступленні ў Еўрасаюз. Дзяржавы-члены ЕС ужо рыхтуюць дамову аб яе далучэнні.

Кос заявіла, што пры захаванні цяперашняй дынамікі рэформаў Малдова атрымае рэалістычную магчымасць завяршыць перамовы аб уступленні ў ЕС у пачатку 2028 года.

6 лістапада Еўрасаюз папярэдне закрыў яшчэ два перамоўныя раздзелы з Чарнагорыяй. Такім чынам, агульная колькасць закрытых раздзелаў дасягнула 23 з 33.

Раней Марта Кос заяўляла, што пры цяперашніх тэмпах рэформаў Чарнагорыя зможа падпісаць дамову аб уступленні ў ЕС ужо ў чэрвені 2027 года.

Каментары да артыкула