Pakareńnie Hamburhu
Maksim Mirny i šved Jonas Bjorkman vyjhrali tenisny turnir u Hamburhu ŭ parnym razradzie. U finale jany pieramahli francuzaŭ Fabrysa Santaro i Mišela Lodra — 4:6, 7:6 (7:2), 7:6 (7:3). Heta druhi tytuł biełarusa ŭ parnym razradzie sioleta i 22-hi za karjeru. Sa źmienaj partnera (letaś Maks vystupaŭ ź indyjcam Machiešam Bchupaci) spravy pajšli značna viesialej. Pośpiech u Hamburhu dazvoliŭ biełarusu ŭźniacca na čaćviertaje miesca ŭ indyvidualnym rejtynhu parnych tenisistaŭ.
Barselona — čempijon
Katalonskaja «Barselona», narešcie, paśla doŭhaha pierapynku zavajavała załatyja medali futbolnaha čempijanatu Hišpanii. Za dva tury da finišu jana zhulała ŭničyju ź «Levante» — 1:1 — i stała niedasiahalnaj dla pieraślednikaŭ z madrydzkaha «Reału». Heta 17-ty tytuł kataloncaŭ.
Fanera nad Vienaj
Čempijanat śvietu pa chakiei 2010 hodu projdzie ŭ niamieckich haradach Kioln i Manhajm. Na kanhresie Mižnarodnaj chakiejnaj federacyi za kandydaturu Niamieččyny prahałasavali 89 čałaviek, za Biełaruś — 18. Biełaruś tolki planuje pabudavać ladovyja pałacy — u stalicy ŭmiaščalnaściu 13 tys. i Žodzinie ŭmiaščalnaściu 6 tys.
Zatoje Biełaruś adchapiła moładzievy čempijanat śvietu (uzrost hulcoŭ da 20 hadoŭ) u padhrupie «V». Jon projdzie ŭ śniežni ŭ Miensku.
Hieroj našaha času
Niamieckaje alimpijskaje tavarystva ŭznaharodziła futbalista nacyjanalnaj zbornaj Niamieččyny i bremenskaha «Verdera» Mirasłava Kloze pamiatnym znakam «Za spartovuju vysakarodnaść». U matčy 32-ha turu bundeślihi suprać «Arminii» pry liku 0:0 Kloze ŭpaŭ u štrafnoj płoščy, i arbitar pryznačyŭ penalci, paličyŭšy, što było parušeńnie. Mirasłaŭ padyšoŭ da sudździ i rastłumačyŭ, što ŭsio było ŭ ramkach pravił. «Verder», darečy, potym pieramoh, a sam Mirasłaŭ zabiŭ miač z hulni.
Kloze, uradženiec Polščy, słynny svajoj dabrynioj. Jon žartuje, što złości jahonaha lubimaha sabaki chapaje na dvaich.
AR, iihf.com, sport-express.ru
Kamientary