Biełarusy masava niasuć hrošy ŭ banki. Čamu tak i nakolki vyhadna kłaści rubli na depazity?

Čamu tak adbyvajecca? 

Ciaham čaćviortaha kvartała 2025 hoda biełarusy štomiesiac abnaŭlali rekordy pa prytoku hrošaj na rublovyja ŭkłady. Apošni kvartał prynios bankam 1,289 miljarda rubloŭ. U pryvatnaści, kastryčnik — 407,7 miljona, listapad — 440,3 miljona, a śniežań — 440,8 miljona rubloŭ.

Apošnija niekalki hadoŭ pracentnyja staŭki pa ŭkładach u dalarach i jeŭra składajuć ad 0,01% da 0,1% hadavych, tamu trymać na ich hrošy faktyčna biessensoŭna. 

Pry hetym pracentnyja staŭki pa rublovych depazitach zastajucca vysokimi i amal nie źmianialisia z kanca listapada 2023 hoda. Tady biełaruskija rubli na biezadzyŭnyja ŭkłady možna było pakłaści pad 13 — 13,5%. Ciapier pracenty pa biezadzyŭnych układach składajuć ad 14,3 da 14,8%.

Razam sa stabilnym kursam rubla rublovyja depazity vyhladajuć pryvabna. U tym liku z ulikam inflacyi, jakaja ŭ apošnija hady vahajecca ŭ miežach ad 5,2% u 2024‑m da 6,8% u 2025-m.

Najbolš vyhadnymi ličacca ŭkłady terminam ad 13 miesiacaŭ, pakolki prybytak ź ich nie abkładajecca padatkam.

Pavialičyć

Što stała z hrašyma, kali ich pakłali hod ci dva tamu?

Dla raźliku voźmiem depazit pad 13% hadavych, hrošy na jaki pakłali 13 miesiacaŭ tamu ŭ kancy śniežnia 2024 hoda. 

Umoŭnyja 10 000 rubloŭ pieraŭtvarylisia b u 11 408 rubloŭ — plus 1 408 rubloŭ.

Kali b układ byŭ adkryty na 24 miesiacy, to ciapier by vy zamiest 10 000 rubloŭ mieli 12 600 rubloŭ. 

I heta ŭkłady biez kapitalizacyi. Kali ŭkład praduhledžvaje kapitalizacyju, to praz 13 miesiacaŭ budzie plus 1510 rubloŭ, a praz 24 miesiacy — plus 2970.

A što budzie, kali pieravieści ŭ dalary?

Matematyka ŭ valucie naohuł vyhladaje ašałamlalna. Kali ŭ śniežni 2024 hoda vy mieli 10 000 rubloŭ, to pa tahačasnym kursie vy mahli kupić za ich kala $2880. Siońnia, źniaŭšy ŭkład z pracentami (11 408 rubloŭ) i kupiŭšy valutu, vy atrymajecie na ruki kala $4000.

Dziakujučy ŭmacavańniu rubla i vysokim staŭkam čysty prybytak u dalarach skłaŭ bolš za $1100. Heta kala 39% hadavych u valucie.

Pavialičyć

Takija vyniki ŭ pieravodzie ŭ dalary atrymalisia za košt taho, što rubiel mocna ŭmacavaŭsia adnosna amierykanskaj valuty, što absalutna nietypova dla Biełarusi.

Ryzyki zastajucca

Pry hetym niama nijakaj harantyi, što ŭ bližejšyja hod-dva situacyja nie źmienicca. Pakolki biełarusy ŭsio jašče tradycyjna vymiarajuć svaje źbieražeńni ŭ dalarach, to, kab nie zhubić hrošy, praz 13 miesiacaŭ dalar musić być nie daražej, čym pa 3,32 rubla. (U raźlik biarecca ŭkład pad 14,3% z kapitalizacyjaj)

U vypadku z 24‑miesiačnym depazitam — nie bolš, čym 3,81 za dalar. (U raźlik biarecca biezadzyŭny ŭkład pad 14,7% z kapitalizacyjaj).

Taksama nieviadoma, jak doŭha moža praciahnucca čas, kali staŭki pa rublovych depazitach buduć na takim ža vysokim uzroŭni. Asabliva va ŭmovach, kali nasielnictva vielmi aktyŭna niasie hrošy ŭ banki.

• 4
• 1
• 4
• 3
• 3
• 0
• 0
• 0