Dyktatura symulakraŭ

Analityki brytanskaha «Ekanamista» ličać sytuacyju vakoł Sajuzu palakaŭ poŭnaj šyzoj. Kałchoźniki!

Feljeton Lolika Uškina.

Kali b isnavaŭ ahrehat času, z zadavalnieńniem machnuŭ by na paru hadzin u budučyniu. Nia z metaj nakiracca «Marsijanskim porteram» (i ŭ vypadku akcyi pa mahčymaści navat atrymać mabiłu-miełafon) abo prahulacca ŭzdoŭž finska-kitajskaj miažy. Prosta kab pahladzieć u katalohu biełaruskaj nacyjanałki raździeł «Łukašyzm».

Daju zub — šmat chto z sučaśnikaŭ ličyć, što, prahłynuŭšy zhadany termin, pošukovaja systema biblijateki zabluje ŭvieś ekran RS miryjadami nazvaŭ nakštałt «Dakumenty i materyjały Škłoŭskaha pracesu: čałaviectva suprać rynačnaha sacyjalizmu», «Klimaks neabalšavizmu i tryjumf teoryi Mizesa» Ja.Ramančuka, «Ucioki z Akreścina» V.Ščukina abo, urešcie, «Nie vinavaty ja. Jon sam pryjšoŭ da ŭłady» A.Fiaduty.

U kantekście apošnich prykołaŭ miarkuju, što bolšaść knižak pra Biełaruś buduć pryśviečany nia losu tuzina dysydentaŭ, a fenomenu tutejšaha režymu ŭ hlabalnych kulturnych pracesach. Na knižnych palicach buduć daminavać nazvy a-la «Ryzoma Deloza i pastanova ab knihach zaŭvah i prapanoŭ» abo «Baraćba z seksualnaj emihracyjaj u RB» .

Łukašenkaŭski aŭtarytaryzm ulipnie ŭ anały Klijo jak pieršy ŭ historyi aŭtarytaryzm fazy postmadernizmu. Sutnaść biełaruskaha ładu ŭžo daŭno nie vyznačajecca niejkaj žorstkaj idealohijaj epochi madernizmu. Nacyjanalizm, sacyjalizm, liberalizm i inšyja «-izmy» ŭ nas nie kanajuć. «SB», viadučy medyja-karaokie ŭładaŭ, moža jenčyć jak Ozi Osbarn nakont renesansu fašyzmu ŭ krainach Bałtyi i paśla pravału referendumu ab kanstytucyi EZ spakojna admarozić: «Usio ž maje racyju Lo Pen». Siońnia zaciukany zachadam słavianski apostał uvodzić vizy dla hruzinaŭ, arhumentujučy ich tak i tak, zaŭtra admianiaje, arhumentujučy voś hetak.

I ni ŭ koha heta nie vyklikaje šoku abo, zdavałasia b, narmalnaj reakcyi — vyklikać chutkuju dapamohu na Marksa, 38.

Paśladoŭny sens zabiła biespryncypovaja ekletyčnaść i tvorčaja reakcyja na štodzionnuju sytuacyju. Pamiatajecie, jak u časy Francuskaj revalucyi Rabespjer i jaho tuśnia admianili kult boha, zamianiŭšy jaho kultam «Najvyšejšaha rozumu»? Kali b našy ŭłady pierasvarylisia ź Fiłaretam i pajšli šlacham jakabincaŭ, abjektam fanatyzmu lahična staŭ by «Najvyšejšy relatyvizm».

I, jak śviedčyć vypadak z vydańniem biełaruskich palakaŭ «Hłos z-nad Niomna», usio na śviecie nie staić na miescy. Vyjšaŭ užo druhi numar vydańnia Sajuzu palakaŭ Biełarusi, jaki redakcyja hazety nie rychtavała. Ale, miarkuju, padpisčyki hazety jaho atrymali spraŭna.

Pačyn treba praciahvać. Heta ž realizacyja na dziaržaŭnym uzroŭni teoryi symulakraŭ Badryjara. Narmalnym pavinna stać toje, što nazvy — apazycyja, ułada, sud — nie adpaviadajuć svaim pieršapačatkovym sensam, ale heta nie vyklikaje abureńnia.

Kali my zdolejem pašyryć takuju praktyku na ŭsie hramadzianskija instytuty, režym budzie vyratavany. Navat abrany z samymi brutalnymi falsyfikacyjami prezydent stanie ŭsprymacca absalutna narmalnym usienarodnavybranym symulakram.

• 0
• 0
• 0
• 0
• 0
• 0
• 0
• 0