Žonka adhavorvała padpałkoŭnika DFR brać chabary, a toj kazaŭ: «Atrymaju pałkoŭnika — i na piensiju». Pieršaja piensija pryjšła ŭžo na aryštancki rachunak
Adzin z surazmoŭcaŭ «Našaj Nivy» raskazaŭ, jak pierasioksia ŭ SIZA KDB z pałkoŭnikam Departamienta finansavych rasśledavańniaŭ Alaksandram Kijko, jaki trapiŭ tudy litaralna na nastupny dzień, jak atrymaŭ novyja pahony. Daviedaŭšysia pra heta, inšy aryštant — mieniedžar «Minskenierha», — radavaŭsia i tancavaŭ, tamu što akazałasia: heta jakraz Kijko jaho raspracoŭvaŭ i ŭpiok u kamieru.
Adzin z surazmoŭcaŭ «Našaj Nivy», jaki prachodziŭ pra SIZA KDB u 2024 hodzie, raskazaŭ fiejeryčnuju historyju pra adnaho sa svaich sukamiernikaŭ, jaki trapiŭ u kamieru nieŭzabavie (pa słovach — na nastupny dzień) paśla atrymańnia pałkoŭnickich pahonaŭ u Departamiencie finansavych rasśledavańniaŭ Kamiteta dziaržaŭnaha kantrolu.
Havorka idzie pra Alaksandra Kijko. Pasada na momant zatrymańnia nieviadomaja, ale letam 2019‑ha jon atrymlivaŭ z ruk tahačasnaha kiraŭnika KDK Leanida Anfimava miedal «Za biezdakornuju słužbu» jak načalnik haradskoha mižrajonnaha adździeła №2 upraŭleńnia DFR KDK pa Minskaj vobłaści.
Pavodle dadzienych Belpol, Alaksandr Kijko naradziŭsia ŭ 1973 hodzie, pačaŭ svaju karjeru ŭ orhanach u 1994‑m jak kantralor Śledčaha izalatara №1 («Vaładarki).
U 1996‑m pierajšoŭ va ŭčastkovyja, potym — u patrulnyja. U 1998 hodzie zvolniŭsia. U 2003 hodzie pajšoŭ pracavać inśpiektaram u DFR.
Čym kankretna zajmaŭsia Kijko na słužbie, nieviadoma. Ale viadoma, što za kraty jon trapiŭ pa abvinavačvańni ŭ atrymańni chabaru.
«Kijko vinu pryznaŭ i sa śledstvam supracoŭničaŭ, praŭda, u kamiery nie raskazvaŭ, jak i kolki braŭ i ci braŭ uvohule. Ale kazaŭ, što žoncy jahonaja rabota nie padabałasia i jana ŭhavorvała jaho zvolnicca sa słužby, maŭlaŭ, nie treba mnie ničoha, a voś pojdzieš da pryvatnika — mnie budzie lepš. A jon adkazvaŭ, što jašče rana, maŭlaŭ, da pałkoŭnika daciahnu — i tady zvolniusia!
U vyniku pałkoŭnika jon atrymaŭ — i adrazu jaho zatrymaŭ KDB pa epizodzie chabara. I voś buchhałtar DFR pieraviała jaho pieršuju pałkoŭnickuju piensiju razam z bonusami za vysłuhu i zarobkam na jahony aryštancki rachunak u KDB. Adkryłasia akienca, i supracoŭnik «Amierykanki» zakryčaŭ matam, maŭlaŭ, Kijko, jak heta razumieć, jak ździek z supracoŭnikaŭ KDB? Ciabie ž potym pieravodzić u inšy izalatar buduć, i mnie pa zakonie treba budzie najaŭnymi vydać usio — 14 tysiač rubloŭ!» — raskazaŭ nam były viazień.
Potym naš surazmoŭca trapiŭ u inšy izalatar, užo nie sistemy KDB, a sistemy MUS.
Zajšoŭšy ŭ kamieru jon, kaniečnie ž, adkazvaŭ na pytańni jaje nasielnikaŭ i raskazvaŭ, z kim i pry jakich abstavinach pierasiakaŭsia raniej.
«Nu i adzin čałaviek kaža: pačakaj, z kim-kim ty siadzieŭ? Z Kijko? Z DFR? Paśla hetaha plaskaje ŭ dałoni i pačynaje śmiajacca, radavacca i prytancoŭvać. Ja pytajusia, što takoje? Akazvajecca, što čałaviek, jakoha tak uzradavała navina pra Kijko za kratami — heta były načalnik upraŭleńnia kapitalnaha budaŭnictva «Minskenierha» Dmitryj Šykuła, jakoha Alaksandr Kijko «raspracoŭvaŭ» i jakomu vynosiŭ pastanovu na aryšt. Šykuła, miakka kažučy, byŭ nie zhodny z arhumientami śledstva i ščyra paradavaŭsia, što jaho jašče navat nie adpravili ŭ kałoniju, a apieratyŭnik pa jaho spravie ŭžo taksama trapiŭ za kraty», — dadaŭ naš surazmoŭca.
Dźmitryja Šykułu, a razam ź im viadučaha inžyniera filijała «Biełenierhaciepłasiećbud» Maksima Jarochina i načalnika filijała Ramana Savina pačali sudzić u sudzie Leninskaha rajona Minska ŭ žniŭni 2024 pa troch artykułach, źviazanych z atrymańniem chabaru.
Dalejšy jahony los, jak i los Alaksandra Kijko, nieviadomyja.
«Naša Niva» — bastyjon biełaruščyny
PADTRYMAĆ
«Muž syšoŭ ź Sipłym i Małym». Imavierna, pad Kramatorskam ukraincy adnym macham ubajdosili troch biełaruskich najomnikaŭ19
Kamientary
Zaraz amapaúcy , karniki , viertuchai