Chronika

Da Maryniča nie puścili advakata

13, 14 i 15 červienia administracyja kalonii №1 nie puściła advakata Valancinu Šychancovu da Michaiła Maryniča, spasłaŭšysia na toje, što niama adpaviednaj zajavy. Advakat śćviardžaje, što ŭsie patrebnyja papiery jana padała.

U Hortali, Ivaceviččyna

Administracyjnaja kamisija Ivacevickaha rajvykankamu pakarała miascovaha žychara Stanisłava Chaładoviča štrafam na vosiem bazavych vieličyń (204 tys. rub.) za niezakonny raspaŭsiud drukavanych vydańniaŭ. Padstavaj dla pakarańnia stała toje, što Chaładovič raspaŭsiudžvaŭ u vioscy Hortal Ivacevickaha rajonu rasiejskuju «Novuju hazietu», brašuru V.Lavonava «Biaz prava na pamyłku» dy infarmacyjnyja materyjały pra dziejnaść kaalicyi «Piaciorka-plus».

Maleja nie zabyvajuć

Deputat Małaryckaha rajsavietu Ŭładzimier Malej atrymaŭ čarhovaje paviedamleńnie adździełu daznańnia UUS Bieraściejskaha abłvykankamu, u jakim lejtenant milicyi V.Harbatoŭskaja infarmuje, što termin śledztva pa kryminalnaj spravie, raspačataj 2 lutaha ŭ dačynieńni da deputata pavodle art.188 č.2 KK, padoŭžany da 2 vieraśnia. Havorka idzie pra raspaŭsiudžvańnie Malejem infarmacyjnaha biuleteniu «Naša słova» №13, u jakim deputat niby padaŭ «iłžyvyja źviestki» pra dziejańni staršyni Małaryckaha rajvykankamu Łapiča.

Pravakacyja z Kiškurnam

13 lipienia synu kiraŭnika Mienskaj haradzkoj rady Partyi BNF Uładzimiera Kiškurny Antonu pradjaŭlena aficyjnaje abvinavačańnie. Śledčyja Centralnaha rajonu Miensku abvinavačvajuć jaho ŭ raspaŭsiudzie narkotykaŭ i zachavańni bojeprypasaŭ. Pa hetych artykułach synu palityka pahražaje da vaśmi hadoŭ pazbaŭleńnia voli.

Polskija spravy

Polski kamitet «Salidarnyja ź Biełaruśsiu» prafinansavaŭ vydańnie sapraŭdnaha №19 hazety «Głos znad Niemna». Polskija žurnalisty dapamahli j aštrafavanym za niesankcyjanavany pikiet žurnalistam hazety vypłacić štrafy na sumu amal u 5,5 tys. dalaraŭ. Hrošy dla hetaha sabrali žychary Łodzi.

Adličeńni «zubroŭcaŭ»

14 lipienia aktyvist niezarehistravanaha ruchu «Zubr» Pavał Madžara vyklučany z 3-ha kursu fakultetu biełaruskaj filalohii Homielskaha ŭniversytetu za «akademičnuju niepaśpiachovaść».

Z 3-ha kursu Biełaruska-rasiejskaha ŭniversytetu ŭ Mahilovie adličany aktyvist «Zubra» Andrej Razumkoŭ. Chłopca nieadnarazova zatrymlivali na niesankcyjanavanych akcyjach.

Prafsajuz dapamoh

11 lipienia Prafsajuz rabotnikaŭ radyjoelektronnaj pramysłovaści (REP) dapamoh svajmu čalcu Tacianie Hardziajčuk adstajać pravy. Adkazčyk — ADA «Liha» — da pačatku sudovaha raźbiralnictva zadavoliŭ patrabavańni byłoj supracoŭnicy i vypłaciŭ kampensacyju 500 tys. rub. (raniej było vypłačana 156 tys.), a taksama dapamoh u pracaŭładkavańni.

Zatrymańni na «Bazary»

Pierad adkryćciom «Słavianskaha bazaru» 15 lipienia ŭ Viciebsku zatrymali raspaŭsiudnikaŭ niedziaržaŭnaj presy (časopis «Arche», kamercyjnaja hazeta «Vitiebskij prośpiekt», a taksama niezarehistravanaje vydańnie «Vybar») Barysa Chamajdu i Alesia Mudryčenku. Patrul zatrymaŭ taksama Siarhieja Mirkušova, jaki vyjšaŭ ź plakatam «Niaŭžo nam tolki treba vidoviščaŭ dy chleba?» — jamu abviaścili sudovaje papiaredžańnie. Chamajdu j Mudryčenku prapanoŭvali być śviedkami na sudzie, ale jany admovilisia.

Homielskaja aktyvistka choča na pracu

U Centralnym sudzie Homielu 15 lipienia pačaŭsia razhlad pazovu aktyvistki hramadzkaha ruchu «Razam» Maryi Bahdanovič da dyrekcyi abłasnoha krajaznaŭčaha muzeju. Jaje, małodšaha navukovaha supracoŭnika, zvolnili ŭ červieni paśla treciaj vymovy. Bahdanovič patrabuje adnaŭleńnia na pracy, ličačy pryčyny zvalnieńnia palityčnymi.

Vyhnali amerykanca

Ź Biełarusi 19 lipienia vysłali prafesara z ZŠA Tery Beša, jaki vykładaŭ u BDU mižnarodnaje prava. Na zbory amerykancu i jahonaj siamji, jakija pražyli ŭ Miensku dva hady, dali dźvie hadziny.

Baranavicki schod

16 lipienia milicyja sprabavała sarvać schod pa vyłučeńni delehataŭ na Kanhres demsiłaŭ, što prajšoŭ u ofisie PKB. Padčas schodu zatrymany Anatol Labiedźka, Siarhiej Kalakin i staršynia mienskaj haradzkoj arhanizacyi AHP Ihar Šynkaryk, u jakoha kanfiskavali 40 partyjnych biuleteniaŭ. Na Labiedźku j Kalakina sprabavali skłaści pratakoły za arhanizacyju niesankcyjanavanaha schodu, ale jany admovilisia davać pakazańni.

Šanc dla Evanhielskaj carkvy

Mienski haradzki sud 18 lipienia prypyniŭ na dva miesiacy rašeńnie pra likvidacyju Biełaruskaj evanhielskaj carkvy: za hety čas supołka pavinna źviarnucca ŭ dziaržstruktury, kab jany znajšli dla jaje juradras.

Štrafy za rajonnyja schody

Aktyvistaŭ AHP Arkadzia Korchava j Vasila Čytajeva 18 lipienia asudzili na 510 tys. rub. štrafu kožnaha: ich abvinavacili ŭ arhanizacyi niesankcyjanavanaha schodu ŭ pryvatnym domie. Na hetym schodzie vybiralisia delehaty na Ŭsiebiełaruski kanhres demakratyčnych siłaŭ.

Štrafy ŭ pamiery piać bazavych vieličyń (127 500 rub.) za niezakonnaje znachodžańnie ŭ pamiežnaj zonie atrymali 18 lipienia aktyvist PBNF Juraś Hubarevič i Źmicier Traciak ź Biełaaziersku. 9 lipienia ŭ miastečku Damačava kala polskaj miažy jany ŭdzielničali ŭ schodzie pa vybrańni delehataŭ na Kanhres ad Bieraściejskaha rajonu.

Miravaja z najmalnikam

Miravoj skončyŭsia pazoŭ siabra prafsajuzu REP(AM) Hienadzia Pačkova da administracyi pradpryjemstva AAT USR «Budkompleks»: jaho zvolnili z parušeńniem zakanadaŭstva, nia daŭšy ŭ dzień zvalnieńnia poŭnaha raźliku, kampensacyi za niavykarystany adpačynak, pracu ŭ škodnych umovach. Pa atrymańni pazovu najmalnik pahadziŭsia vypłacić sumu ŭ 153 tys.rub., što z ulikam terminu zatrymki ŭ 94 dni vyrasła da 1 młn 210 tys.

Kiraŭski seminar — pad sudom

Kiraŭski rajsud (Mahiloŭščyna) aštrafavaŭ arhanizatarku seminaru pa vyvučeńni pracoŭnaha zakanadaŭstva Hannu Hataviec na 50 b.v. (1 młn 275 tys. rub.) Mierapryjemstva było arhanizavana HA «Biełaruski respublikanski klub vybarščykaŭ» u admysłova arandavanaj kaviarni.

SB, AŠ

• 0
• 0
• 0
• 0
• 0
• 0
• 0
• 0