Były kiraŭnik Polskaj Narodnaj Respubliki hienerał Vojciech Jaruzelski paprasiŭ prabačeńnia ŭ čechaŭ za ŭdzieł polskaha vojska ŭ intervencyi 1968 h.
21 žniŭnia spoŭnilisia 37-ja ŭhodki z pačatku ŭvodu vojskaŭ Varšaŭskaha paktu ŭ Čechasłavaččynu. 200 tysiač žaŭnieraŭ i 5 tysiač tankaŭ piaci krain u noč z 20 na 21 žniŭnia 1968 h. spynili sprobu pabudovy «sacyjalizmu ź ludzkim tvaram», zroblenuju hrupaju partyjnych českich refarmataraŭ pad kiraŭnictvam pieršaha sakratara KPČ Alaksandra Dubčaka. U vyniku ŭvarvańnia zahinuła kala 100 čałaviek, a Dubčaka vysłali ŭ Turcyju pasłom. Akramia Polščy i SSSR, svaich žaŭnieraŭ u Čechasłavaččynu dasyłali Vuhorščyna, Baŭharyja i Ŭschodniaja Niamieččyna.
Na hetyja ŭhodki pa českaj televizii vystupiŭ Vojciech Jaruzelski, jaki tady byŭ ministram abarony Polščy i padpisvaŭ zahad dla žaŭnieraŭ Vojska Polskaha. Stary, 82-hadovy Jaruzelski moviŭ: «Ja hladžu na heta ź vialikim smutkam, ale na toj čas nia moh pastupić inakš. Palityčna heta byŭ durny akt, ale nie padpisać zahad było nierealna. Za toje, što ja ŭdzielničaŭ u pryniaćci rašeńnia, prabačcie. Chaču heta skazać jašče raz, zaakcentavać i padkreślić».
Vice-staršynia českaha Senatu Pieter Pitchart pryznaŭ pieraprašeńnie za «vielmi pierakanaŭčaje i ščyraje». Ale prezydent Vacłaŭ Kłaŭs dasiul ličyć Jaruzelskaha za symbal akupacyi j dušyciela polskaj «Salidarnaści».
Na pačatku 1990-ch u polskim Sojmie Jaruzelski ŭžo prasiŭ prabačeńnia ŭ prezydenta Vacłava Haŭła. Skazaŭ tady, što intervencyja była «vialikaju palityčnaju i maralnaju pamyłkaju».
Pieraprašeńnie ad prezydenta Rasiei dasiul nie pačuta, dyj kajacca kiraŭnictva byłych savieckich respublik, vidać, nie źbirajecca. A pra mierkavańnie tahačasnaha kiraŭnictva SSSR — ciapierašnich pensyjaneraŭ — my nie daviedajemsia, bo postsavieckamu hramadztvu dy ŚMI heta nie cikava.
Kamientary