Akademik Alaksandar Vajtovič u interviju «Narodnaj voli» raskryŭ cikavyja padrabiaznaści funkcyjanavańnia dziaržaŭnaj ułady.
«Ja stajaŭ pierad vybaram: zhubić pavahu da samoha siabie albo zastacca ŭ zhodzie sa svaim sumleńniem. Bo ŭsiaho, čaho ja dasiahnuŭ u žyćci da hetaha momantu, ja dasiahnuŭ samastojna. I pryvyk siabie pavažać. A tut — jak u kino pra kryminalnych aŭtarytetaŭ.
U toj dzień ja viarnuŭsia ad Łatypava i pačaŭ telefanavać prezydentu. Byŭ pačatak treciaje hadziny, ale spadara Łukašenki na miescy nie było. Zrešty, heta zvyčajnaja praktyka. Kali niama bujnych mierapryjemstvaŭ, jon nia nadta bavicca na pracy: pryjaždžaje kala 10-j i paśla druhoj jaho ŭžo niama. Mahu ŭpeŭniena skazać pra heta, bo vokny majho kabinetu vychodziać na ŭjezd u budynak Administracyi prezydenta, i karcina pierad maimi vačyma amal štodnia była adna i taja ž.
Tak voś, u pryjomnaj kažuć: jon u rezydencyi. Telefanuju tudy: dziažurny aficer adkazvaje, što prezydent hulaje ŭ chakiej (i heta ŭ pracoŭny čas, a jak ža z dyscyplinaj pracy, pra jakuju tak lubiać kazać?)».
A.Vajtovič taksama ŭzhadaŭ, što na pasadzie staršyni Savietu Respubliki jon raz u try miesiacy atrymlivaŭ premijalnyja ŭ valucie, što, jak viadoma, zabaroniena zakonam. Karespandent radyjo «Svaboda» admysłova pierapytaŭ akademika Vajtoviča nakont zarobkaŭ u valucie. «Nia tolki vyšejšamu kiraŭnictvu płaciać u valucie, ale i mnohim ludziam», — adkazaŭ sp.Vajtovič.
Nahadajem, što pra atrymańnie valuty dla zaachvočvańnia supracoŭnikaŭ BT śviedčyŭ u svaich pakazańniach i Jahor Rybakoŭ.
Kamientary