Lidery apazycyi šmatkroć zajaŭlali, što hałoŭnaja zadača – «vyvieści ludziej na vulicy». Kaštunica i Juščanka takoha nie kazali. Jany nia stavili kalosaŭ papiarod kania i ličyli hałoŭnym pieramohu na vybarach. Kali dać ludziam ideju, spraviadliviejšuju za Łukašenkavu, i prahramu, pryvabniejšuju za Łukašenkavu, vybarcy ŭ razie patreby sami vyjduć na vulicy. Kali papularnaść Milinkieviča pieravysić Łukašenkavu, abaranić pieramohu stanie spravaj techniki.
Tonkaść biełaruskaj sytuacyi ŭ tym, što systema palacić navat raniej, čym rejtynh Milinkieviča dasiahnie ŭmoŭnaha 51%. Varta jamu prosta pieravysić niejki punkt kipieńnia — ciažka skazać, kolki heta ŭ biełaruskich umovach, 20, 30 ci 40 pracentaŭ, — jak režym pačnie sypacca ź siaredziny. Hetym my roźnimsia ad Ukrainy, što ŭsio ž była demakratyčnaj. Aŭtarytarnaja systema niestabilnaja pa vyznačeńni. Sułtanat ža ŭvohule nie praduhledžvaje alternatyvy i hruntujecca na padtrymańni lehiendy ab lideru nacyi z absalutnaj padtrymkaj. Lehienda rušycca — i sułtan śledam za joj.
U hetym vypadku nie kaniečnie da ŭłady adrazu pryjduć Demakratyčnyja siły. Ale transfarmacyja režymu stanie niepaźbiežnaju.
Milinkievič — vializnaja ŭdača apazycyi. Vybar spyniŭsia na lidery razumnym, realistyčnym i achviarnym adnačasova. Heta kampensuje ŭsie jaho mahčymyja słabiny. Samaachviarnaść supervažnaja va ŭmovach, kali apazycyja nia maje ni harantyj, ni imunitetu. «Źniščeńnie — fizyčnaje ci niejkaje inšaje — adzinaha kandydata moža ŭ vyniku zrabicca adnym z samych mahutnych mabilizacyjnych faktaraŭ», — zajaviŭ Milinkievič. Tak, u Alaksandra Druhoha jość i idejny stryžań, i navina.
Ale ci zmoža Milinkievič dasiahnuć hetaha pierałomnaha rejtynhu, kali niama revalucyjnaj sytuacyi?
Štości adziny kandydat nabiraje prosta za košt tych, chto nia cierpić «škłoŭskaha samarodka». Niešta jašče — z hałasoŭ patryjotaŭ. Trochi — miž ziemlakoŭ. Nieštački ŭ jaho adhryzajuć kandydaty-raskolniki. Dla krytyčnaje masy patrebnaja jarkaja, uciamnaja i realistyčnaja sacyjalna-ekanamičnaja prahrama — vobraz inšaje Biełarusi, jakuju my možam pabudavać. Ci stvoryć?
Usioj toj raściarušanaj bolšaści ludziej, jakija adčuvali siabie durniami ŭsie hetyja hady, Milinkievič daŭ nadzieju. Jany niucham adčuli — voś jana, narmalnaść, dakranisia, jana pobač, voś jon, narmalny palityk, pry jakim kraina stanie narmalnaju i nikomu prytym nia stanie horš.
Hetym Milinkievič vyklikaŭ vializnuju cikavaść da siabie. Hazety ź Milinkievičam na pieršaj pałasie pradajucca na ŭlot. U internet-apytańniach na jahonuju temu ŭdzielničaje rekordnaja kolkaść naviednikaŭ. Pa kolkaści spasyłak na siabie jon pierahnaŭ usich palitykaŭ. Dzivosna ŭzros hramadzki aptymizm. Tak, siarod apytanych na sajcie naviny.by nakont šancaŭ adzinaha kandydata na pieramohu mierkavańnia «łbom muru nie prabješ» trymajecca ŭsiaho 24%. Niečuvana mała dla Biełarusi.
Pazytyŭ vodhukaŭ Milinkievič sam nazvaŭ «avansam». Heta bolš adbitak hramadzkich čakańniaŭ, čym zroblenaha samim palitykam. Sama hetaja zapatrabavanaść farmuje fenomen Milinkieviča. Palityčnaje žyćcio imkniecca da alternatyŭnaści, i Milinkievič-funkcyja viartaje hetuju alternatyŭnaść. Što vyhadna mnohim-mnohim, a mo i ŭsim. Karaciej, biary i pieramahaj.
