Papski medal biełaruskamu ksiandzu

U niadzielu 8 lipienia 2007 h. u kaściole Narodzinaŭ Najśviaciejšaj Panny Maryi ŭ h. Barysavie adbyłosia ŭračystaje ŭručeńnie miedala Pro Ecclesia et Pontifice (Za zasłuhi pierad Kaściołam i Papam) šmathadovamu probašču hetaj parafii, Barysaŭskamu dekanu ksiandzu Juzafu Piatušku, maryjaninu. Va ŭračystaści ŭziali ŭdzieł Apostalski Nuncyj u Biełarusi arcybiskup Marcin Vidavič, Apostalski Administratar Minska‑Mahiloŭskaj archidyjacezii biskup Antoni Dziamjanka, Apostalski vizitatar dla hreka‑katalikoŭ u Biełarusi ks. archimandryt Siarhiej Hajek MIS, śviatary i šmatlikija vierniki.

Papski miedal Pro Ecclesia et Pontifice, zasnavany Papam Lvom XIII, maje ŭžo bolš za stohadovuju historyju. Jon uručajecca za admysłovyja zasłuhi ŭ słužeńni Kaściołu i Śviatomu Ajcu. Miedal vykanany ŭ formie załatoha kryža ź bieła‑žoŭtaj stužkaj. Na im źmieščanyja postaci śviatych Piatra i Paŭła, try małyja kryžy, deviz Pro Ecclesia et Pontifice, imia i hierb papy. Hetym miedalom uznaharodžvajucca jak duchoŭnyja asoby, tak i śvieckija kataliki, što śviedčyć pra adzinstva misii ŭsiaho Božaha Naroda, niezaležna ad kankretnaha słužeńnia, jakoje vykonvaje ŭ adpaviednaści sa svaim paklikańniem kožny viernik.

Pradstaŭnik Śviatoha Ajca arcybiskup Marcin Vidavič zaznačyŭ, što hetaja ŭznaharoda źjaŭlajecca taksama ŭznaharodaj, uručanaj viernikam barysaŭskaj parafii i ŭsioj Biełarusi.

Sioleta ksiondz Juzaf Piatuška adśviatkavaŭ piacidziesiacihadovy jubilej svajho śviatarstva. Jahony los u mnohim padobny da losu tych starejšych śviataroŭ, jakija naradzilisia na Biełarusi, potym byli vymušanyja vyjechać za jaje miežy, žyć i słužyć Bohu ŭdalečyni ad radzimy, a kali źjaviłasia mahčymaść viarnucca — adrazu ž viarnulisia i pačali nieści Božaje słova i Božy spažytak tym, chto šmat hadoŭ byŭ pazbaŭleny mahčymaści žyć paŭnakroŭnym chryścijanskim žyćciom.

Ksiondz Juzaf naradziŭsia ŭ vioscy Pierachody, na Vilenščynie. U malenstvie chłopčyk razam ź siamjoj žyŭ u Rosicy, u tym samym miastečku, dzie padčas apošniaj vajny razam ź miascovymi žycharami pryniali mučanickuju śmierć maryjanie Antoni Laščevič i Jury Kašyra. Baćka budučaha śviatara siabravaŭ tady z błahasłaŭlonym Antonijem Laščevičam, z ruk jakoha syn Juzik pryniaŭ Pieršuju śviatuju Kamuniju. Potym siamja vyjechała ŭ Polšču i, mahčyma, dziakujučy hetamu acaleła.

U 1948 h. Juzaf Piatuška ŭstupiŭ u navicyjat ordena ajcoŭ maryjanaŭ i praz hod skłaŭ pieršyja manaskija šluby, paśla čaho była vučoba ŭ duchoŭnaj sieminaryi. 24 lipienia 1954 hoda jaho razam ź inšymi bratami maryjanami polskaja słužba biaśpieki prymusova vyviezła ŭ Hietšvałd. Tolki praź niejki čas jon znoŭ mieŭ mahčymaść praciahvać vučobu ŭ sieminaryi i adnačasova ŭ Akademii katalickaj teałohii. Paśla śviatarskaha paśviačeńnia, pryniataha ŭ 1957 hodzie, ksiondz Juzaf słužyŭ Bohu i ludziam u roznych miescach: pracavaŭ siarod studentaŭ Lublinskaha univiersiteta, navučaŭ relihii dziaciej i moładź, za što źviedaŭ pieraśled z boku kamunistyčnych uładaŭ.

Jon šmat času pryśviačaŭ vychavańniu moładzi: i tady, kali byŭ prefiektam maryjanskaj sieminaryi ŭ Lublinie, i kali paźniej zajmaŭsia spravami paklikańniaŭ u Varšavie. Padčas dušpastyrskaj pracy ŭ instytucie psichijatryi i nieŭrałohii ŭ Varšavie, ajciec Juzaf zasnavaŭ tam supolnaść adnovy ŭ Duchu Śviatym.

Jon nie mieŭ niedachopu ŭ pracy, jahonaja słužba była zaŭsiody cikavaja i šmathrannaja, ale ŭvieś čas u pamiaci žyŭ uspamin pra radzimu i ŭśviedamleńnie taho, što tam, na Biełarusi, a taksama i va ŭsim SSSR, ludzi nie mieli mahčymaści žyć paŭnakroŭnym chryścijanskim žyćciom. Heta padšturchnuła śviatara ŭ 70‑ia hady pajechać na radzimu, nibyta ŭ hości. Paśla byli pajezdki ŭ 1971—1989 hh. u roznyja harady Savieckaha Sajuza, jakija stali svojeasablivym misijanierskim słužeńniem. U toj čas ks. Juzaf jeździŭ u Varoniež, Irkuck, Omsk, Leninrad, Minsk, Mahiloŭ, Oršu, Ryhu, Kijeŭ, dzie celebravaŭ sv. Imšu i ŭdzialaŭ śviatyja sakramenty. Tolki ŭ Mahilovie jon achryściŭ 60 dziaciej.

U misijanierskich pajezdkach ajca Juzafa svoj pryncyp, jaki hruntavaŭsia na nakazie adnaviciela zakona maryjanaŭ błahasłaŭlonaha Juryja Matuleviča — iści tudy, dzie ciažej. Byŭ u jahonym misijanierstvie i vymušany pierapynak: u 1981—1983 hh., kali ŭ časy dziejnaści «Salidarnaści» z Polščy było vielmi ciažka vyjechać.

Ks. Juzaf byŭ siabram ajca Alaksandra Mienia. Ajciec Juzaf jeździŭ da jaho ŭ Padmaskoŭje, mieŭ z hetym śviatarom nie adnu źmiastoŭnuju razmovu. Potym ajciec Mień pa zaprašeńni ajca Juzafa naviedaŭ jaho ŭ Varšavie. Hetych ludziej abjadnoŭvali adnolkavyja pohlady na čałavieka i jahonaje pryznačeńnie ŭ śviecie.

U 1990 hodzie ks. Juzaf viarnuŭsia na Biełaruś i ŭžo siemnaccać hadoŭ addana pracuje ŭ barysaŭskaj parafii Narodzinaŭ Najśviaciejšaj Panny Maryi. Jon zasłužyŭ pavahu viernikaŭ svajoj bieskaryślivaj słužbaj, svaim niepatrabavalnym da vyhodaŭ (usie hetyja hady jon žyvie ŭ maleńkim pakojčyku nad sakrystyjaj) žyćciom, toj nieabyjakavaściu, ź jakoj jon zaŭsiody ŭsprymaŭ ludskija prablemy. Atrymanaja ks. Juzafam Piatuškam uznaharoda Pro Ecclesia et Pontifice śviedčyć pra pryznańnie Śviatym Ajcom jaho zasłuhaŭ pierad usim Kaściołam.

Iryna Žarnasiek, Catholic.by

• 0
• 0
• 0
• 0
• 0
• 0
• 0
• 0