Žychar Baranavičaŭ «zaminiravaŭ» kinateatr, kab pabačyć reakcyju śpiecsłužbaŭ
Sud admieraŭ jamu 8 miljonaŭ rubloŭ štrafu.
Uviečary 2 kastryčnika 2012 hoda na śpiecliniju «101» pastupiła paviedamleńnie ab tym, što praź dźvie hadziny razdasca vybuch u baranavickim kinateatry «Zorka», piša «Intex-press».
Z budynka evakujavali kala 170 čałaviek. Prybyłyja na miesca zdareńnia sapiory nijakaha vybuchovaha prystasavańnia nie znajšli.
Telefonnym «terarystam» apynuŭsia 47-hadovy žychar Baranavičaŭ. Na «101» mužčyna telefanavaŭ sa svajho mabilnaha telefona, znachodziačysia ŭ stanie ałkaholnaha apjanieńnia.
Na sudzie svoj zvanok jon patłumačyŭ tym, što «chacieŭ prosta pravieryć, jak reahujuć roznyja słužby na takija paviedamleńni».
Sud pryznaŭ haradžanina vinavatym u zaviedama iłžyvym paviedamleńni pra niebiaśpieku — złačynstvie, praduhledžanym art. 340 KK.
Uličvajučy toje, što mužčyna da hetaha ni razu nie pryciahvaŭsia da kryminalnaj adkaznaści, sud pryznačyŭ jamu pakarańnie ŭ vyhladzie štrafu ŭ pamiery 8 młn. rubloŭ (80 bazavych vieličyń).
Prysud u siłu jašče nie ŭstupiŭ i moža być abskardžany.
Kamientary