Brytanka ledź nie pamiorła, kali kletki dziciaci z kalapłodnymi vodami trapili ŭ lohkija
32-hadovaja Endžeła Kotem ledź nie stała achviaraj redkaha ŭskładnieńnia pry rodach, jakoje sustrakajecca ŭ adnym vypadku z 80 tys.
Endžeła, ciažarnaja dvajniatami, była dastaŭlena ŭ balnicu z preekłampsijaj (poźni taksikoz ciažarnych). Pry preekłampsii raźvivajecca vysoki cisk i acioki. Hety stan vielmi niebiaśpiečny, tamu miedyki vyrašyli vykłkikać rody za piać tydniaŭ da termina, kab zachavać žyćcio maci i dźviuch dziaŭčynak. Rody prajšli paśpiachova, ale paśla ich Endžeła stała achviaraj jašče ciažejšaha sindromu — embalii kalapłodnych vodaŭ, paviedamlaje The Daily Mail.
Heta redkaje zachvorvańnie ŭźnikaje, kali kalapłodnyja vody pranikajuć u kryvatok maci.Razam z vadkaściu ŭ kroŭ Endžeły trapili kletki paznohciaŭ ci vałasoŭ jaje dziaciej. Inšarodnyja abjekty dajšli da lohkich i vyklikali mocnuju alerhičnuju reakcyju. Endžeła pačała zadychacca, a potym jaje lohkija pierastali pracavać. Bolš za toje, kroŭ žančyny pierastała zhortvacca i jana zhubiła amal čatyry litry kryvi.
Miedykam spatrebiłasia zrabić 22 pieralivańni za try hadziny, kab stabilizavać stan Endžeły, jakaja trapiła ŭ komu i pračnułasia praz 12 hadzin.
Bolšaść miedykaŭ nikoli nie sutykajucca z embalijaj kalapłodnymi vodami, bo jana sustrakajecca redka: pavodle roznych źviestak ad adnaho vypadku da 80 tys. rodaŭ, i pryčyna ŭźniknieńnia embalii kalapłodnymi vodami dakładna nieviadoma, ale časta jana ŭźnikaje ŭ žančyn, ciažarnych dvuma ci bolš dziećmi, i joj papiaredničaje aktyŭnaja rodavaja dziejnaść.
Kamientary