Pierad vybarami ŭ Vieniesuele ŭłady nahniatajuć isteryju. Vykonvajučy abaviazki prezidenta Vieniesueły Nikałas Madura ŭ čaćvier rasparadziŭsia ŭziać pad ŭzbrojenuju achovu usie elektrastancyi krainy ŭ suviazi z «vypadkami sabatažu z boku pravych sił».
«Ja rasparadziŭsia, kab usie stancyi i padstancyi krainy byli ŭziatyja pad uzbrojenuju achovu i kab byŭ raspracavany śpiecyjalny płan pa ich abaronie ad sabatažu», — pryvodziać słovy Madura miascovyja ŚMI.
Palityk i kandydat u prezidenty padkreśliŭ, što takija miery pryniaty ŭ suviazi z nadychodziačymi vybarami 14 krasavika i vypadkami sabatažu ŭ dačynieńni da zabieśpiačeńnia elektraenierhijaj terytoryi krainy.
«Biezadkazna pradstaŭniki pravych sił arhanizujuć zaraz sproby poŭnaha adklučeńnia elektryčnaści», — skazaŭ Madura. Jon padkreśliŭ, što ŭsie čynoŭniki, jakija ŭdzielničajuć u zmovie suprać naroda Vieniesueły, paniasuć pakarańnie i buduć addadzieny pad sud.
Ciapier palicejskija častki i nacyjanalnaja hvardyja ŭžo zajmajuć elektrastancyi, u pryvatnaści, u štacie Arahua, dzie ŭ suviazi z adklučeńniem enierhii byŭ źniaty kiraŭnik miascovaj elektryčnaj kampanii.
Adklučeńni elektryčnaści zdarajucca ŭ Vieniesuele pieryjadyčna, asabliva ŭ pieryjad śpioki, u suviazi ź vialikaj pierahruzkaj elektrasistemy, jakaja nie daje rady nahruzkam. Pytańnie ŭ jaje znošanaści i niedastatkovaj mahutnaści. Adnak upieršyniu ŭłady sprabujuć vytłumačyć zboi «dziejańniami apazicyi».
Vieniesuelskaja apazicyja ličyć, što čavisty ruchajuć krainu ŭ bok dyktatury, manipulujučy śviadomaściu z dapamohaj ŚMI.
Ciapier čytajuć
Mer Minska chacieŭ sabie pasadu va ŭradzie, ale Łukašenka nie puściŭ2
Kamientary