Kitaj pazyčyć $322 miljony na rekanstrukcyju darohi Babrujsk-Žłobin

Ministerstva finansaŭ Biełarusi vydzielić atrymany ad Ekspartna-impartnaha banka Kitaja kredyt bolš čym na $322 miljony RUP «Mahiloŭaŭtadar» dla rekanstrukcyi aŭtamabilnaj darohi M5/Je271 Minsk — Homiel na ŭčastku Babrujsk — Žłobin.

Heta praduhledžana pastanovaj Savieta ministraŭ ad 2 krasavika 2013 hoda № 249.

Jak paviedamlaje pres-słužba Savieta ministraŭ Biełarusi, razmova idzie ab ilhotnym pakupnickim kredycie, jaki vydzialajecca dla rekanstrukcyi darožnaha ŭčastka ŭ adpaviednaści z kredytnym pahadnieńniem pamiž uradam Biełarusi i Ekspartna-impartnym bankam Kitaja ad 19 śniežnia 2012 hoda.

Ministerstva finansaŭ zaklučyć dahavor ab paradku vykarystańnia i pahašeńnia nazvanaha kredytu z RUP «Mahiloŭaŭtadar», Ministerstvam transpartu i kamunikacyj i AAT «Bielinviestbank», jakoje vyznačana bankam-ahientam pa absłuhoŭvańni hetych kredytnych srodkaŭ.

Zabieśpiačeńnie realizacyi prajekta «Mahiloŭaŭtadaram» i kantrol za metavym vykarystańniem pradpryjemstvam kredytu daručany Ministerstvu transpartu i kamunikacyj.

Piersanalnaja adkaznaść za metavaje vykarystańnie srodkaŭ kredytu ŭskładziena na hienieralnaha dyrektara RUP «Mahiloŭaŭtadar» i ministra transpartu i kamunikacyj.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH